Alatala Topotangara to nanoa
50
Dade Asaf.Notesamo i PUE Alatala to Neliu Nggakuasa;
Iꞌa nompokio tau-tau nggari njumaongu dunia,
nggari pebulu nu eo sampe ri kasolona.
2 Nggari Sion, kota to neliu nggagaya,
Alatala neumba ante reme-Na.
3 Alatalata narata bo daꞌa nekalino;
apu to najela-jela nokolu ka Iꞌa,
bo Iꞌa nitalili poiri to naramboso.
4 Iꞌa nompokio langi bo dunia,
ala majadi sabi tempo Iꞌa mantangara todea-Na.
5 Niuli-Na, “Pasiromumo pura-pura todea-Ku to natutu nantuki Aku,
etumo ira to nowia pojanji ante Aku
to nipakaroso ante pesomba to nisambale.”
6 Langi nompopokita Alatala nanoa nantangara todea-Na,
sabana Iꞌa mboto najadi topotangara.
7 Niuli-Na, “Epemo, todea-Ku, Aku kana motesa.
Umba komi to Israel, Aku kana majadi sabi mompakanoto sala komi.
Aku eꞌimo Alatala, Alatala to nisombamu!
8 Aku daꞌa nombasuku komi sabana pesombamu to nisambale ka Aku,
bara pesomba to nitunu to naria ri ngayo-Ku eo-eo.
9 Aku daꞌa nomparaluu japi nggari gimpumu,
bara towau nggari olo pompatuwumu.
10 Sabana pura-pura binata riara nggayu,
bo binata ri njobu-njobu buluna, a Akumo puena.
11 Pura-pura tonji ri laerawa,
bo pura-pura binata to natuwu ranggawoko, Aku woꞌu puena.
12 Ane maoro taꞌi-Ku, daꞌa paraluu Kutesa ka komi,
sabana dunia ante pura-pura isina, Akumo puena.
13 Aku daꞌa nanggoni bau japi tuama,
daꞌa woꞌu nanginu lei towau tuama.
14 Waimo pesomba posukuru ka Alatala,
bo pakadupamo janjimu ka (i PUE) to Neliu Nggalanga.
15 Pekakaimo ri jaꞌi-Ku ri tempo kasusa,
pade Aku manggabasaka komi,
bo komi kana mantoiya Aku.”
16 Tapi iweꞌimo tesa i PUE ka tau najaꞌa,
“Daꞌa masipato komi mombasowadaka Atura-atura-Ku,
bara mantesa pojanji-Ku.
17 Sabana nipowua matamu pepatuduki-Ku,
bo niporau raramu parenta-parenta-Ku.
18 Ane iko nanggita topangangga, iko woꞌu nowega ante iꞌa,
bo nosimporoa ante tau-tau nebualo.
19 Iko tunggai notesa to najaꞌa,
bo batena nodawa.
20 Iko batena nompakajaꞌa sampesuwumu,
bo nanguli sinjaꞌi sampesuwu otemu.
21 Etumo to nikawiamu, tapi Aku daꞌa notingo,
jadi nipekirimu Aku nasimbayu ante iko.
Tapi weꞌi-weꞌi Aku kana mombasuku iko,
bo mompakanoto kasalamu etu.
22 Toramo, komi to nanggalinga Alatala,
neꞌe sampe komi Kupakaropu,
pade daꞌa ria tau mompakasalama komi.
23 Tau to nombawai pesomba posukuruna,
iꞌamo to nombabila Aku.
Bo tau to natuwu nanoa,
kana Kupakasalama.”