Daꞌa ria gunana nanjarumaka kakalumana
49
Dade muli Korah ka topopalu dade.2 Umba komi pura-pura manusia, epemo!
Umba komi pura-pura tau to netoꞌo ri dunia, petalingamo,
3 nabelo ka tau biasa, nabelo ka tau to nibila,
nabelo ka tau nakasiasi, nabelo ka tau nakalumana.
4 Aku kana mompatuduki komi ala majadi manoto,
aku kana mompekiri anu to mompakataꞌu komi.
5 Aku kana mantaꞌa talinga mangepe tesa-tesa noto,
bo mompakanoto batuana ante mokanda kacapi.
6 Aku daꞌa maeka tempo kasusa,
tempo aku ratiku nu bali-bali to najaꞌana.
7 Ira etu aga nanjarumaka kakalumana ira,
bo nompakalanga rara sabana nadea mbara-mbarana.
8 Kakonona daꞌa kamba sambaꞌa mamala mompakasalama sampesuwuna,
atau mombawai doi ka Alatala ala mantolo iꞌa.
9 Nau nuapa-nuapa rawai daꞌa ntoto magana.
Sabana nasuli mpuꞌu oli sambaꞌa manusia,
10 ala iꞌa makabasaka nggari kamatea,
bo mamala matuwu sampe ri kasae-saena.
11 Kakonona manusia manggita
tau nanoto woꞌu kana mamate.
Iwetu woꞌu tau to napii pekirina bo todoyo kana mamate pura,
bo mompalasi mbara-mbara ira ka tau ntanina.
12 Ira kana metoꞌo riara dayo sampe ri kasae-saena;
batena ri setumo petoꞌo ira,
naupa nggaulu nadea tana ira.
13 Naupa manusia nakalumana, daꞌa mamala matuwu mpeliu,
iꞌa woꞌu kana mamate nasimbayu ewa binata.
14 Iwetumo to najadi ka tau to nanjarumaka korona mboto,
bo iwetumo kaopu katuwu ntau aga nantuki tesana mboto.
15 Ira nipakatantu Alatala mamate nasimbayu ewa bimba;
ira kana mamate bo ratana.
Ira kaliu-liu nesua riara dayo,
koro ira nasalisa napopo;
dunia ntomate najadi petoꞌo ira.
16 Tapi Alatala kana mompakasalama aku nggari kuasa kamatea,
sabana Iꞌa kana mantarima aku.
17 Neꞌe masusa raramu ane maria tau najadi nakalumana,
bo mbara-mbara ri sapona nantambai kadeana.
18 Sabana tempo iꞌa mamate daꞌa ria nuapa-nuapa mamala rakenina,
mbara-mbarana daꞌa rakenina mpaka riara dayo.
19 Naupa tempo iꞌa danatuwu nirasaina nasana,
bo nitoiya-toiya ntau sabana noasele katuwuna,
20 iꞌa woꞌu kana mantuki jala ntotuꞌana,
mpaka ri petoꞌo to narumau sampe ri kasae-saena.
21 Manusia to nakalumana, tapi daꞌa ria notona,
nasimbayu ewa binata to namate.