Sion, Kota Alatala
48
Dade muli Korah.2 Nabete mpuꞌu kuasa i PUE bo Iꞌa masipato ratoiya
ri kota Alatalata, ri bulu-Na to nagasa.
3 Bulu Sion bulu Alatala to nalanga bo nagaya,a
kota petoꞌo Magau to Nabetena,
to nipodamba njumaongu dunia.
4 Alatala netoꞌo riara sapo kamagau-Na ri Bulu Sion,
bo Iꞌa mbotomo nanggalendu kota etu.
5 Kitamo, magau-magau nasiromu;
ira narata madota mesuaki.
6 Tapi nanggita kota etu natikajamo ira,
pade nangowa nalai ante eka rara.
7 Ri setumo ira nolalete ante naeka rara,
bo nombarasai juꞌa ewa juꞌa besi mana masae moana.
8 Ira nipakaropu-Mu,
ewa sakaya bete Tarsisb nagero niburu mpoiri naramboso.
9 Nuapa to niepeta bopia, iwetu woꞌu to nikitata,
ri kota i PUE to Neliu Nggakuasa,
ri kota Alatalata.
Kota etu nipakaroso-Na sampe ri kasae-saena.
10 O Alatala, riara sapo-Mu
kami nantondoaka towe-Mu to daꞌa ria kaopu-opuna.
11 Sanga-Mu natolele bo nitoiya ri njumaongu dunia;
Komi noparenta ante nanoa.
12 Pakambamo todea ri Kota Sionc bo todea ri bagia Yehuda madamba-damba,
sabana Komi nombasuku bali ira.
13 Polumakomo mantalili Kota Sion, talilimo kota etu,
bo rekemo sou mpojaga to nalangana.
14 Pariara ntaꞌimo tembona, paresamo walana,
ala mamala ratesa komi ka mulimu banepia.
15 Iꞌamo Alatala, Alatalata sampe ri kasae-saena.
Iꞌamo to manggeniaka kita sampe ri kasae-saena.