Alatala Magau njumaongu dunia
47
Dade muli Korah ka topopalu dade.2 Umba komi todea ri pura-pura ngata, posapa palemo ante madamba-damba!
Toiyamo Alatala ante mongare madamba-damba!
3 Sabana nabaraka mpuꞌu i PUE to Neliu Nggalanga.
Iꞌa Magau to nombakuasai njumaongu dunia.
4 Niwai-Na ka kita kuasa nombadagi todea ri ngata-ngata,
kita nompatundu pue-pue ngata ntanina.
5 Nipelisi-Na ka kita tana majadi bagiata,
tana nipodamba rara nto Israel to nipotowe-Na.a
6 Alatala nepone mpaka ri pekatoko-Na,
nituki ntau to nongare-ngare nadamba-damba bo nantawui kololio.
7 Podademo dade mantoiya Alatala,
podademo dade posukuru ka Magauta!
8 Sabana Alatala Magau ri njumaongu dunia;
toiyamo Iꞌa ante dade pepatuduki.
9 Alatala nekatoko ri pekatoko-Na to nagasa;
Iꞌa nomparenta todea nggari ngata-ngata ri njumaongu dunia.
10 Pura-pura topanggeniaka ri dunia nasiromu
najadi todea nu Alatala to nisomba Abraham,
sabana pura-pura magau natundu ri jaꞌi-Na.
Iꞌa mpuꞌu-mpuꞌu nibila bo nakuasa.