Alatala nanggalendu bo nantulungi kita
46
Dade muli Korah ka topopalu dade. Nipodade nantuki dade to nosanga ka “Alamot.”2 Alatala nanggalendu bo nompakaroso kita;
Iꞌa batena nantulungi kita riara kasusata.
3 Jadi kita daꞌa maeka, naupa dunia mogoya,
bo bulu-bulu matala riara ntasi.
4 Naupa tasi manggarau ante balumbana,
bo bulu-bulu molalete nirumpana.
5 Naria ue binangga noili to nompakadamba rara todea ri kota Alatala,
etumo petoꞌo nagasa to nipetoꞌo Alatala to Neliu Nggalanga.
6 Alatala netoꞌo ri saꞌa, jadi kota etu daꞌa namala radagi;
kota etu kana rajagai-Na tempo eo ntora nebulu.a
7 Alatala nosuara ewa guntu, bo dunia narege nggaoya.
Iꞌa nompakagado todea ri ngata-ngata,
bo nompakagero poparenta-poparenta ira.
8 PUE to Neliu Nggakuasa nomporoa kita;
Alatala to nisomba Yakub nanggalendu kita.
9 Kamai kitamo nuapa to nipowia i PUE;
nipowia-Na to nipogumaa ri dunia.
10 Nipopenonto-Na posibali ri njumaongu dunia.
Pana bo tawala nipakakoto-Na,
kaliawo-kaliawo nipalabu-Na.
11 Niuli-Na, “Penontomo mosibali!
Kitamo! Aku eꞌimo Alatala!
Aku kana rapakalanga ri tatongo todea ri pura-pura ngata;
Aku kana rapakalanga ri njumaoungu dunia.”
12 PUE to Neliu Nggakuasa nomporoa kita,
Alatala to nisomba Yakub nanggalendu kita.