Dade tempo posusa ponika magau
45
Dade muli Korah ka topopalu dade. Dade pepatuduki nipodade nantuki dade to nosanga ka “Bunga Bakung.” Dade towe.2 Tesa-tesa nabelo nesuwu nggariara ntaꞌiku,
kupodade dadeku ka magau.
Ewa patolo nipotulisi tau nataꞌu,
jilaku nasadia mantesa dulua.
3 Komi to neliu nggagaya ri olo manusia;
tesa-tesamu nabelo pura.
Etumo sabana komi nigane Alatala
sampe ri kasae-saena.
4 Umba komi magau to naroso bo nabia,
takamo guma ri kopemu!
Popokitamo kuasa bo kagayamu!
5 Kalaumo ante kuasamu mombadagi balimu.
Pasimbukumo mantakono tesa to nakono bo nanoa.
Kawiamo ante karosomu nuapa-nuapa to nipogumaa.
6 Wilamu to nataja nantosu sule nu balimu,
todea nggari ngata-ngata ntanina nadungga ri ngayomu.
7 Alatala nombawai ka komi kuasa ala moparenta sampe ri kasae-saena;
komi moparenta todeamu ante manoa.
8 Komi nompotowe to nabelona bo nomporau to najaꞌana.
Etumo sabana Alatala, Alatalamu nompelisi komi,
bo nompakasana komi neliu nggari magau-magau ntanina.
9 Pura-pura pakeamu nawongi soana,
nesoa dupa to nawongi bo wongi-wongi ntanina.
Komi nitalili musi kacapi riara sapo magau,
to nipakagaya ante ramba to nipowia nggari ngisi-ngisi gaja.
10 Ri setu naria ana-ana besi magau-magau,
nosanggani ante besi-besi to nokarajaa ri sapo magau.
Ri pangganamu nenggore boti besi
ante ramba-ramba bulawa to daꞌa ria galona.
11 Umba komi boti besi, petalingamo tesaku.
Kalingamo todeamu bo sampesuwumu.
12 Kagayamu nompakaino rara magau.
Iꞌamo magaumu; pekoumo ri jaꞌina.
13 Todea nggari ngata Tirus nanggeni pesomba ri jaꞌimu;
tau nakalumana nompasimbuku mangala raramu.
14 Nagaya mpuꞌu boti besi tempo iꞌa nesua ri sapo magau;
bajuna nisuji ante bana bulawa.
15 Ante pakea nisuji mpakagaya-gaya iꞌa nikeni mpaka ri jaꞌi magau,
nosanggani ante roa-roana besi.
16 Ira nongare nadamba-damba,
tempo nikeni mpaka riara sapo magau!
17 O magauku, ana-anamu langgai kana moparenta manjambei totuꞌamu nggaulu.
Ira kana mupajadi tau nakuasa ri njumaongu dunia.
18 Ante dade eꞌi kupatolele sanga komi sampe ri muli nu muli.
Jadi todea ri ngata-ngata ntanina kana mantoiya komi sampe ri kasae-saena.