Posambaya ntau tempo nipandasa
44
Dade muli Korah ka topopalu dade. Dade pepatuduki.2 O Alatala, niepe kami mbotomo
tesa to niuli ntotuꞌa kami nggaulu
nantesa kabaraka to nipowia Komi
ri tempo nggaulu.
3 Ante kuasa-Mu mboto Komi nompopalai todea nggari ngata-ngata ira,
ala todea-Mu metoꞌo ri ngata etu.
Tau-tau ntanina nipandasa-Mu,
tapi todea-Mu nipajadi-Mu matuwu masana.
4 Ngata nipetoꞌo totuꞌa kami etu daꞌa niago ira ante guma,
bo daꞌa ante karoso ira mboto sampe ira padagi,
tapi ante kuasa, karoso bo petulungi-Mu,
sabana Komi nompotowe ira.
5 Komimo magauku bo Alatalaku,
to nompakatantu nombawai kuasa ka todea-Mu nombadagi bali ira.
6 Ante kuasa-Mu kami nombadagi bali-bali kami,
bo ante petulungi-Mu kami nompatesi tau-tau to nombasuaki kami.
7 Aku daꞌa nanjarumaka panaku,
bo gumaku woꞌu daꞌa nompakasalama aku.
8 Tapi Komimo to nompakasalama kami nggari bali,
bo tau-tau to nomporau rara kami nidagi-Mu sampe naeya mata ira.
9 Jadi kami batena mompakabete bo mantoiya Komi,
bo mosukuru ri jaꞌi-Mu sampe ri kasae-saena.
10 Tapi weꞌi-weꞌi Komi nompalasi kami,
bo nompakamba kami nidagi.
Komi mana nomporoa tantara-tantara kami nosibali.
11 Nipakamba-Mu kami nangowa nalai nggari bali kami,
bo mbara-mbara kami niago tau-tau to nomporau rara kami.
12 Nipakamba-Mu kami nipatesi ewa bimba nisambale,
bo niposimpotatare-Mu kami ri tatongo todea nggari ngata-ngata ntanina.
13 Nipobalu-Mu todea-Mu ante olina to neliu nggamura,
sampe daꞌa nombarata sarona.
14 Kami nipajadi-Mu wua mpantesa ntau to netoꞌo ri sinjori kami;
kami nipongei bo nipongiri ira.
15 Kami nipajadi-Mu tau to nipongei-ngei todea nggari ngata-ngata ntanina;
kami nisalai bo nipongiri-ngiri ira.
16 Njaneo ntua aku nisalai,
bo mpuꞌu-mpuꞌu naeya mataku,
17 sabana nangepe pekakee bo pesalai
nggari sumba nu bali to nomboli rau rara.
18 Pura-pura etu najadi ri jaꞌi kami,
tapi kami daꞌa nanggalinga Komi,
bara nombaliunaka janji-Mu.
19 Rara ntaꞌi kami daꞌa nanjapuaka Komi;
parenta-Mu daꞌa niliunaka kami.
20 Tapi nipandasa bo nipalamba-Mu kami ri petoꞌo to nakalinoa;a
nipalasi-Mu kami riara karumauna.
21 Ane rapana kami daꞌa mana nombasomba Alatala kami,
aga nepue ka pue-pue ntanina,
22 natantumo kana ranjani Alatala,
sabana ninjani-Na isi rara ntaꞌi kami.
23 Kami batena nipararai rapatesi, sabana kami natutu nantuki Komi.
Kami nireke ewa bimba to rasambale.
24 O PUE, pembangumo! Nokuya Komi naturu?
Kamaimo! Neꞌe rapalasi kami sampe ri kasae-saena!
25 Nokuya Komi netabuni,
bo nanggalinga kasusa bo kapari kami?
26 Kami nanawu narege ri tana,
koro kami nipandoo ri sowu sabana nidagi.
27 Pembangumo bo kamaimo mantulungi kami;
pakasalamamo kami sabana towe-Mu to daꞌa ria kaopu-opuna!