BUKU KARONGUNA
Mazmur 42-72
Posambaya tempo nisoko nikeni mpalai
42
Dade pepatuduki muli Korah ka topopalu dade.2 O Alatala, ewa rusa nalentora manginu ue binangga,
iwetumo raraku nalentora ka Komi.
3 Nalentora mpuꞌu raraku mosanggani ka Alatala, Alatala to Natuwuna.
Nepia aku mamala malau mombasomba Alatala ri Sapo-Na?
4 Eo wengi aku notumangi,
aga ue mata najadi panggoniku.
Njaneo ntua baliku nompongei aku ante nekutana,
“Ri umbamo Alatala to nisombamu?”
5 Nalebuku mpuꞌu raraku nantora tempo nggaulu,
tempo aku nalau ri Sapo Mpepue
nosanggani ka tau dea.
Aku nolumako ri ngayo ntau dea
ante nongare nadamba-damba bo nodade dade posukuru,
nosanggani ka tau dea nalau nantuki eo bete nombatoiya Alatala.
6 Notesamo aku riara ntaꞌiku, “Nokuya raraku nasusa bo nawulesa?
Aginapa aku manjarumaka Alatala!
Sabana aku kana mosukuru bali ri jaꞌi-Na,
ri jaꞌi Alatalaku, Topompakasalama aku.”
7-8 Ri petoꞌo aku nisoko nikeni mpalai nageromo raraku.
Sabana etu natetoramo aku ka i PUE.
Wayoku natikeni riara kasusa.
Aku nirata kasusa bo kapari neliu nggadea nggari jaꞌi-Mu,
nasimbayu ewa karamboso ue surembe Binangga Yordan,
to noili nggari Bulu Hermon bo Bulu Mizar.
9 Ri tempo eona i PUE nompakanoto ka aku towe-Na to daꞌa ria kaopu-opuna,
bo ri tempo nggawengina aku nodade saongu dade posambaya
ka Alatala, puꞌu katuwuaku.
10 Nekutanamo aku ka Alatala, Topanjaliku aku,
“Nokuya Komi nanggalinga aku?
Nokuya aku batena nandasa
sabana nipandasa bali-baliku?”
11 Nagero mpuꞌu raraku sabana nipongei nu baliku.
Njaneo ira nekutana ka aku, “Ri umbamo Alatala to nisombamu?”
12 Notesamo aku riara ntaꞌiku, “Nokuya raraku nasusa bo nawulesa?
Aginapa aku manjarumaka Alatala!
Sabana aku kana mosukuru bali ri jaꞌi-Na,
ri jaꞌi Alatalaku, Topompakasalama aku!”