Posambaya merapi rapakalino nggari juꞌa
41
Dade i Daud ka topopalu dade.2 Nasana mpuꞌu tau to nompariarantaꞌi tau to daꞌa nompakule;
iꞌa kana ratulungi PUE riara kasusana.
3 Iꞌa kana rakalendu bo rapiara i PUE,
iꞌa rapakasana ri dunia,
bo daꞌa rapalamba rapongei nu balina.
4 PUE kana mantulungi iꞌa tempo majuꞌa ri paturuna,
bo mompakabelo juꞌana.
5 Niuliku, “O PUE, nasilakamo aku ri jaꞌi-Mu;
poasi matamo aku bo pakalinomo juꞌaku.”
6 Bali-baliku najaꞌa tesana nanguli aku,
niuli ira, “Nepiamo iꞌa mamate bo sangana rakalinga?”
7 Tempo ira narata nantalioda aku,
daꞌa ante rara nabelo.
Ira aga nangelo-ngelo tesa to daꞌa nabelona nanguli aku,
pade nompatolele tesa etu mpaka ri umba-umba.
8 Pura-pura tau to nawua mata nanggita aku nosiwawayo-wayo nantesa aku;
ira nonia jaꞌa ri jaꞌiku.
9 Niuli ira, “Nandasa mpuꞌu juꞌana,
mana rapakulena membangu nggari paturuna.”
10 Nau wega rapaku to niparasayaku,
to nanggoni mpasanggani ante aku nompobalu aku.
11 O PUE, poasi matamo aku bo pakalinomo juꞌaku,
ala aku mamala mombabalasi kajaꞌa nu baliku.
12 Ane aku daꞌa radagi nu baliku,
kana kunjani aku nikonoa rara-Mu.
13 Komi nantulungi aku sabana aku bate natundu ri jaꞌi-Mu ante rara nanoa;
Komi mompowia aku matuwu mosanggani ante Komi sampe ri kasae-saena.
14 Toiyamo i PUE, Alatala to nisomba nto Israel!
Toiyamo Iꞌa nompamula weꞌi-weꞌi sampe ri kasae-saena!
Kajadimo iwetu! Amin!