Posambaya bo posukuru
40
Dade i Daud ka topopalu dade.2 Ante nosabara aku nompopea petulungi PUE,
pade Iꞌa nompeili aku bo nangepe pekakaiku.
3 Nionggotaka-Na aku nggari lowu to nandalana,
nggari gege bo lonjo.
ꞌꞌNionggotaka-Na aku mpaka ri petoꞌo to naꞌamana,a
sampe nabelo polumakoku.
4 Nipatuduki-Na aku nodade dade to nabou,
dade mantoiya Alatalata.
Nadea tau nanggita powia i PUE etu pade nekou,
bo nomparasaya Iꞌa.
5 Nasana mpuꞌu tau to nomparasaya i PUE,
to daꞌa nanjarumaka tau-tau to nalanga rarana,
atau nerapi tulungi ka tau-tau topodawa.
6 O PUE Alatalaku, nadea mpuꞌu to nipowia-Mu ri jaꞌi kami,
etumo tandai to nipogumaa bo nia-Mu ka kami.
Daꞌa ria to namala rapakasimbayu ante Komi!
Aku nompasimbuku mantesa bo mompatolele pura-pura etu,
tapi daꞌa kupakule, sabana nadea gaga.
7 Pesomba to nisambale bo pesomba nggari asele tuja-tuja daꞌa nipokono-Mu;
pesomba to nitunu bo pesomba posompo silaka daꞌa niperapi-Mu.
Tapi niwai-Mu ka aku talinga
to namala nangepe Komi.
8 Pade nangulimo aku, “Eꞌimo aku,
riara Buku Atura Alatala naria nitulisi to nosinggawela ante aku.
9 O Alatala, nadamba raraku nantuki dota-Mu,
niboliku Atura-Mu riara ntaꞌiku.”
10 Riara kasiromu todea-Mu,
nipatoleleku kareba belo to nanguli Komi batena nanoa.
O PUE, daꞌa nenonto-nonto aku nompatolele kareba etu,
ewa ninjani-Mu mboto.
11 Kareba etu daꞌa niboliku riara ntaꞌiku,
tapi nipatoleleku ka tau, Komi batena nantulungi bo nompakasalama.
Riara kasiromu todea-Mu daꞌa nitabuniakaku tesa to nanguli,
Komi batena nantulungi ante towe to daꞌa ria kaopu-opuna.
12 O PUE, neꞌe menonto mompotowe aku;
kalendumo aku ante towe-Mu to daꞌa ria kaopu-opuna,
bo batena mantulungi aku.
13 Sabana aku nitiku pepandasa to nakajana,
to daꞌa namala nibila kadeana.
Aku ewa niraga silaka-silakaku,
sampe aku daꞌa namala nekita.
Kadea silakaku neliu nggadeapa nggari woꞌo ri balenggaku,
sampe naopumo raraku.
14 O PUE, tulungi pakasalamamo aku!
O PUE, pakasalisamo mantulungi aku!
15 Pakambamo tau to madota mompatesi aku,
radagi bo maingu mangowa malai.
Pakambamo tau to nadamba manggita aku rapandasa,
rapopalai bo rapakaeya.
16 Pakambamo tau to nompongiri aku,
majadi matikaja bo maeya mata.
17 Tapi perapi pura-pura tau to nombasomba Komi,
masana bo madamba-damba.
Perapi tau to nadamba sabana nipakasalama-Mu,
batena manguli, “Nabete mpuꞌu kuasa i PUE!”
18 Aku eꞌi nandasa bo nakasiasi,
tapi Pue nompariarantaꞌi aku.
O Alatala, Topetulungi bo Topompakasalama aku,
neꞌe masae-saeka marata mantulungi aku!