Posambaya merapi tulungi tempo kasusa
39
Dade i Daud ka Yedutun, topopalu dade.2 Nipekiriku, “Aku kana mombajagai pokaingguku,
ala daꞌa masilaka ante jilaku.
Aku kana mombalamu sumbaku,
ane damaria tau najaꞌa namosu ante aku.”
3 Jadi nekalinomo aku ewa tobobo,
nau tesa-tesa nabelo daꞌa niuliku.
Tapi aga nantambaimo
katomo kasusa to nirasaiku.
4 Aku nipandasa kakini raraku,
nantambai nipekiriku nantambai nasusa raraku.
Kaopuna nangulimo aku,
5 “O PUE, tesamo nepiamo aku mamate.
Sakuyapa kasaena umuruku,
ala kunjani katuwuku ri dunia aga sampalai.”
6 Kitamo, nambuku mpuꞌu umuruku nipakatantu-Mu!
Ri mata-Mu kasaeku natuwu daꞌa ria batuana.
Mpuꞌu-mpuꞌu katuwu manusia aga ewa nosa nisuupaka.
7 Katuwu manusia nasasinta nalipo ewa wayo,
pura-pura to nompakasiwu iꞌa daꞌa ria gunana.
Iꞌa nompasiromu mbara-mbara nadea,
tapi daꞌa ninjanina isema rakabolina.
8 O Pue, nuapa to kupopea weꞌi-weꞌi?
Aga Komimo panjarumakaku.
9 Kabasakamo aku nggari pura-pura silakaku,
neꞌe rapakamba aku majadi wua mpantesa ntau nadoyo.
10 Aku nekalino ewa tobobo,
sabana Komimo to nombasuku aku.
11 Neꞌe mana Komi mombasuku aku,
sabana aku sakedika namate nawela poboba-Mu.
12 Komi nombasuku bo nombaboba manusia,
sabana kasala ira.
Komi nompakalipo kakalumana ira,
nasimbayu ewa saipa nanggoni mbara-mbara to nasuli olina.
Mpuꞌu-mpuꞌu manusia aga ewa nosa nisuupaka.
13 O PUE, epemo posambayaku, pariarantaꞌimo pomperapiku.
Neꞌe mekalino mangepe aku motumangi.
Aku aga ewa torata ri dunia,
nasimbayu ewa pura-pura totuꞌaku nggaulu.
14 Neꞌe mana manggita aku ante rau rara-Mu,
ala aku madamba bali
daꞌapa aku mompalasi dunia eꞌi,
bo mana ntoto maria.