Posambaya tempo najuꞌa
38
Dade i Daud tempo nombawai pesomba ala iꞌa ratora i PUE.2 O PUE, neꞌe rasuku aku ante rau rara-Mu,
neꞌe rapandasa aku ante gigi rara-Mu.
3 Wila-Mu nombatosu koroku,
pale-Mu nantamanaka aku.
4 Aku najuꞌa ntomo sabana rau rara-Mu;
daꞌa ria to nabelo ri koroku sabana silakaku.
5 Neliu nggadea kasala to nipowiaku,
natomo mpuꞌu silaka to nirasaiku.
6 Baka-bakaku nanana bo nawau soana,
sabana kadoyoku.
7 Natomo mpuꞌu juꞌaku sampe nompakabunggu aku.
Njineo ntua aku nakandodo bo nasusa rara.
8 Napane mpuꞌu koroku sabana najuꞌa,
daꞌa ria to nabelo nirasaiku.
9 Nalente puramo wukuku, mana ria karoso koroku.
Aku nekakai ante nasusa rara.
10 O PUE, ninjani-Mu pura to nipodotaku,
ponguaku daꞌa nitabuniakaku ka Komi.
11 Nolete-lete suleku bo naopumo karosoku,
bo nagawu woꞌu mataku.
12 Roa-roa bo wega-wegaku nompakakawao koro ira nggari jaꞌiku sabana juꞌaku,
bo sampesuwu-sampesuwuku woꞌu nompalasi aku.
13 Tau-tau to madota mompatesi aku
mombataꞌa tandoko ka aku.
Tau-tau to madota mompakasusa aku
mangelo jala mompakarugi aku.
Njineo ntua ira mangelo akala mompakanawu aku ante pebagiu.
14 Tapi aku eꞌi netibongo ewa tau daꞌa namala neꞌepe,
aku netibobo ewa tau daꞌa nasowa notesa.
15 Mpuꞌu-mpuꞌu aku ewa tau daꞌa neꞌepe,
bo daꞌa notingo.
16 O PUE, aku batena nanjarumaka Komi.
Pue Alatalaku, Komimo to mombasono aku.
17 Niuliku, “Neꞌe rapakamba bali-baliku madamba-damba manggita aku nasusa,
neꞌe rapalamba ira mompakalanga rara tempo aku nandasa.”
18 Sakedika aku naopu rara,
bo aku batena najuꞌa.
19 Aku nompangaku silaka-silakaku,
bo nakini raraku nompekiri kasalaku.
20 Bali-baliku nadea bo naroso,
nadea ira nawua mata ri jaꞌiku ante daꞌa ria saba.
21 Ira nombabalasi powiaku to nabelo ante kajaꞌana,
ira nangewa aku sabana aku nompasimbuku nowia belo.
22 O PUE, neꞌe mompalasi aku!
O Alatalaku, neꞌe makawao nggari jaꞌiku!
23 O PUE, Topompakasalama aku,
karatamo masalisa mantulungi aku! -[