Powia Alatala ka tau najaꞌa bo tau nanoa
37
Dade i Daud. aNeꞌe magigi rara manggita tau nowia jaꞌa,
neꞌe masiriati ri jaꞌi ntau to noinggu nadenggo.
2 Sabana ira masalisa mangau ewa kawoko,
bo malele ewa tuja-tuja.
3 Parasayamo ri jaꞌi PUE, bo powiamo to nabelo,
karoomo ri tana eꞌi, bo batena matutu mantuki Iꞌa.
4 Pakadamba-dambamo raramu mantora i PUE,
pade Iꞌa kana mombawai ka komi nuapa to nipoino raramu.
5 Jujumo katuwumu ri jaꞌi PUE,
bo sarumakamo Iꞌa,
pade Iꞌa kana mantulungi komi.
6 Iꞌa kana mompopokita kanoamu ewa reme nu eo newanta mpadondona,
bo mompopokita parakara komi nakono ewa wana nu eo nompakareme ntongo eo.
7 Tongorakamo i PUE ante mekalino,
popeamo Iꞌa ante mosabara.
Neꞌe marau rara manggita tau noasele katuwuna,
neꞌe marau manggita tau to nebagiu.
8 Neꞌe mana marau bo mabelisi;
neꞌe magigi rara, etu aga manggeni komi mowia kajaꞌana.
9 Neꞌe mana marau bo mabelisi, sabana tau-tau to nowia jaꞌa kana rapakaropu,
tapi tau-tau to nanjarumaka i PUE kana mombarata tana to nijanji-Na.
10 Tau najaꞌa kana masalisa malipo,
nau raelo mana rarata.
11 Tapi tau to naede rarana kana mombarata tana to nijanji-Na etu,
bo ira kana madamba-damba sabana katuwu ira neliu nggasana.
12 Tau najaꞌa nonia jaꞌa ka tau nabelo,
bo nosinggiki baga nanggita ira ante rau rara.
13 Tapi Pue nompongiri tau najaꞌa,
sabana ninjani-Na tau etu mana masae ka rasuku.
14 Tau najaꞌa nangosu gumana bo nombadii pana ira
ala mompatesi tau to nakasiasi bo nasusa katuwuna,
bo mompatesi tau to natuwu nanoa.
15 Tapi tau najaꞌa kana ratosu nu gumana mboto,
bo pana ira kana rapakakoto.
16 Neliu nggabelopa mbara-mbara sakedi to naria ri jaꞌi ntau to nanoa,
pade mbara-mbara to nadea ri jaꞌi ntau to najaꞌa.
17 Sabana kuasa tau najaꞌa kana rapakalipo i PUE,
tapi tau nanoa rakalendu-Na.
18 PUE batena nombajagai tau-tau to nagasa katuwuna,
tana niwai ka ira batena najadi bagia ira sampe ri kasae-saena.
19 Ri tempo kasusa ira daꞌa mandasa,
ri tempo oro ira batena mabosu.
20 Tapi tau najaꞌa kana maropu;
bali-bali PUE kana mangau ewa sese kawoko ranggarawana,
bo malipo ewa sumoa.
21 Tau najaꞌa nanginda doi tapi daꞌa nipopanjilina,
tapi tau nanoa nombawai ante najoi rarana.
22 Tau to nigane i PUE kana mombarata tana to nijanji-Na,
tapi tau to nijanjiaka-Na kana rapakaropu.
23 PUE nombanini tau ri jala to masipato ratukina,
nipakaroso-Na tau to natuwu nantuki dota-Na.
24 Naupa iꞌa nadungga, daꞌa sampe natudu ri tana,
sabana i PUE nanjoko palena.
25 Nompamula nggari kakediku sampe ri katuꞌaku,
daꞌa sanggani nikitaku tau nanoa nipalasi PUE,
daꞌa ria nikitaku mulina nerapi-rapi panggoni.
26 Tau etu batena naꞌasi mata bo nompopoinda doina,
bo mulina najadi rasi riara nggatuwuna.
27 Kabasakamo to najaꞌana, powiamo to nabelona,
ala iko maroo ri tana to nijanji sampe ri kasae-saena.
28 Sabana i PUE nompokono pokainggu to nanoana.
Tau to natutu nomparasaya Iꞌa daꞌa rapalasi-Na.
Nikalendu-Na ira sampe ri kasae-saena,
tapi muli ntau najaꞌa kana rapakaropu.
29 Tau nanoa kana mombarata tana to nijanji-Na,
bo maroo ri setu sampe ri kasae-saena.
30 Tau nanoa notesa ante noto,
bo tesana batena nanoa.
31 Atura Alatala to nisombana naria riara ntaꞌina,
bo daꞌa niliunakana.
32 Tau nanoa nitingawu ntau najaꞌa,
ala mangelo loga mompatesi iꞌa.
33 Tapi PUE daꞌa nompakamba iꞌa manawu riara mpale balina,
atau rapakasala tempo ratangara.
34 Sarumakamo i PUE bo tukimo parenta-Na,
pade iko kana raonggotaka-Na mombarata tana to nijanji-Na,
bo iko kana manggita tau-tau najaꞌa rapakaropu.
35 Aku nanggita tau najaꞌa bo nasoa;
iꞌa ewa kayu to naboyana bo nandala kalena.
36 Tapi tempo aku noliu, mana ria iꞌa,
tempo aku nangelo iꞌa, daꞌa nirataku.
37 Pariara ntaꞌimo tau to nabelo bo nanoa rarana,
sabana tau to nompokono posinggabelo kana mombarata belo ri eo nggapurina.
38 Tapi tau-tau nasilaka kana rapakaropu;
pade ri eo nggapurina muli ira kana rapakalipo.
39 PUE nompakasalama tau-tau nanoa;
bo nanggalendu ira ri tempo kasusa.
40 Nitulungi bo nipakasalama-Na ira,
bo nikabasaka-Na ira nggari jaꞌi tau-tau najaꞌa,
sabana ira nekalendu ri jaꞌi-Na.