Kajaꞌa manusia bo kabelo Alatala
36
Dade i Daud, batua i PUE, ka topopalu dade.Kajaꞌa manusia
2 Silaka notesa riara ntaꞌi tau to najaꞌa;
iꞌa daꞌa ntoto naeka ka Alatala.
3 Nirasaina iꞌa nataꞌu mpuꞌu,
sampe daꞌa ninjanina kasalana,
bo daꞌa nipowua matana ingguna mboto.
4 Tesa-tesana najaꞌa bo nadea bagiuna,
iꞌa mana nowia to nabelo bo nanoto.
5 Ri paturuna iꞌa nowia nia jaꞌa;
powiana daꞌa ria to nabelona,
nuapa to najaꞌana daꞌa nipoarana.
Kabelo Alatala
6 O PUE, towe-Mu to daꞌa ria kaopu-opuna,
nalanga mpolangi.
Komi batena nompakadupa janji-Mu sampe ri kasae-saena.
7 O PUE, kanoa-Mu nalanga ewa bulu,
bo atura-Mu nandala mpotasi.
Manusia bo binata nipiara-Mu.
8 O Alatala, neliu mpuꞌu kabete towe-Mu to daꞌa ria kaopu-opuna,
manusia nekalendu ri jaꞌi-Mu ewa ana manu nekalendu ri wayo nggapi ntinana.
9 Ira nabosumo ante panggoni to neliu nggadea ri sapo-Mu,
bo nantarima mpengele-ngele to nabelona nggari jaꞌi-Mu,
to noili ewa ue.
10 Komimo puꞌu katuwua ka pura-pura to natuwuna.
Nggari reme-Mu katuwu kami nipakareme.
11 Perapi Komi batena mompotowe tau to nosinjani ante Komi,
bo mowia to nanoa ka tau-tau to natutu nantuki dota-Mu.
12 Neꞌe rapakamba aku rasuaki ntau to nasombona,
atau rapasuma ntau to najaꞌa.
13 Kitamo, nanawumo tau-tau to nowia jaꞌa,
ira nidungganaka bo mana namala nembangu.