Posambaya merapi tulungi
35
Dade i Daud.O PUE, ewamo tau to nangewa aku,
posibalimo ka tau to nosibali ka aku.
2 Alamo kaliawo bete bo kaliawo nggedi,
bo karatamo mantulungi aku!
3 Alamo kanjaꞌi-Mu bo tawala-Mu,
ala mangewa tau to nombaraga aku.
PUE, ulimo ka aku,
Komimo Topompakasalama aku.
4 Pakambamo tau to madota mompatesi aku
radagi bo rapakaeya.
Pakambamo tau to masintuwu mangewa aku
malai ante maingu.
5 Pakambamo ira raposimpotatare malaeka i PUE,
ewa kuli mpae nitawui mpoiri.
6 Pakambamo ira raraga malaeka i PUE
ri jala to narumau bo naringgaya.
7 Ira nantaꞌa tandoko ala mombasoꞌo aku, nau daꞌa ria saba.
Pade ira nombakae lowu rapombanawusaka aku, nau daꞌa ria tanje.
8 Pakambamo ira rapakaropu
ante daꞌa ninjani-njani.
Pakambamo ira matesoꞌo ante tandoko to nitaꞌa ira mboto,
pade manawu bo maropu.
9 Jadi aku kana madamba-damba sabana powia i PUE,
raraku kana madamba sabana Iꞌa nompakasalama aku.
10 O PUE, ante mpuꞌu-mpuꞌu rara aku nanguli,
Komi daꞌa ria kasimbayuna!
Komi nanggabasaka tau to nalente nggari jaꞌi ntau to naroso,
bo nantulungi tau to nalente bo nakasiasi tempo tau naroso nompandasa ira.
11 Sabi-sabi to najaꞌa narata nangewa aku,
bo nombasangga aku nanggawia anu to daꞌa ninjaniku.
12 Kabeloku nibalasi ira ante kajaꞌana.
Mpuꞌu-mpuꞌu naopumo raraku!
13 Tapi tempo ira najuꞌa aku nasusa rara bo daꞌa nanggoni.
Aku notunggou nosambaya,
14 ewa nosambaya ka roaku,
atau sampesuwuku to najuꞌa.
Aku notunggou nantangi ira,
ewa aku nantangi kamate indoku.
15 Tapi tempo aku nombarata kasusa, ira nadamba
bo nasiromu nangewa aku.
Tau-tau ntanina to daꞌa ninjaniku
daꞌa nenonto-nonto nompongei-ngei aku.
16 Ira najaꞌa mpuꞌu bo daꞌa nenonto-nonto nompongei aku,
ira nompowua mata aku ante nosinggiki baga nanggita aku.
17 O Pue, sampe nepia
Komi aga manggita bayangi?
Pakasalamamo aku nggari pesuaki ira,
kabasakamo aku nggari bali-baliku to nangewa aku ewa singa to narosona!
18 Aku kana mosukuru ri jaꞌi-Mu ri tatongo pura-pura todea-Mu,
bo mantoiya sanga-Mu ri kasiromu ntau dea.
19 Neꞌe rapakamba baliku madamba-damba manggita aku nasusa.
Neꞌe rapakamba aku rapongei-ngei ntau to nomporau rara aku ante daꞌa ria saba.
20 Tesa ira daꞌa nabelo;
ira aga nonia mombabagiu tau to natuwu nosinggabelo.
21 Ira nongare-ngare ri jaꞌiku bo nanguli,
“Najaꞌa mpuꞌu iko! Nikita kamimo powiamu!”
22 O PUE, nikita Komi mbotomo powia ira etu.
Neꞌe aga mekalino,
neꞌe makawao nggari jaꞌiku.
23 Karatamo Komi manjaliku aku riara parakaraku.
O Alatalaku, PUEku, tulungimo aku!
24 O PUE Alatalaku, salikumo aku sabana Komi nanoa,
neꞌe rapakamba baliku madamba-damba manggita aku nasusa.
25 Neꞌe rapakamba ira motesa riara ntaꞌi, “Nasanamo rarata, namala nompatesi iꞌa.
Etumo to nipodotata!”
26 Pakambamo tau to nadamba nanggita kasusaku
majadi maingu bo maeya.
Pakambamo tau nasombo nanggita aku,
rasalai bo rapakaeya.
27 Perapi tau to madota manggita aku ratakono i PUE,
mongare madamba-damba.
Perapi ira daꞌa mabasa-basa manguli,
“PUE Neliu Nggabete!
To nipodota-Na ala batua-Na masalama!”
28 Jadi aku kana mompatolele powia-Mu to nanoa,
bo mantoiya Komi njineo ntua.