Dade mantoiya kabelo i PUE
34
Dade i Daud, tempo iꞌa netibaya-baya ri ngayo Magau Abimelek, sampe iꞌa nipopalai nggari setu. a2 Aku madota mosukuru ri jaꞌi PUE ri butu-butu eo,
bo daꞌa menonto-nonto mantoiya Iꞌa.
3 Aku kana mompakabete PUE riara nggatuwuku sabana pura-pura to nipowia-Na.
Waikamo tau to nipandasa mangepe tesa etu pade madamba-damba.
4 Toiyamo i PUE mosanggani ante aku,
kamaimo kita mosanggani-nggani mantoiya sanga-Na.
5 Aku nosambaya ri jaꞌi PUE, pade nisono-Na aku,
bo nikabasaka-Na aku nggari pura-pura eka raraku.
6 Tau-tau nanjarumaka Iꞌa bo nadamba-damba,
ira daꞌa rapakaeya.
7 Tau to nipandasa niepe PUE pekakaina,
bo nikabasaka-Na nggari mpengele-ngele kasusa.
8 Malaeka i PUE nantalili tau to nekou ri jaꞌi-Na,
ala mombajagai bo mompakasalama ira.
9 Rasai bo kita mbotomo kabelo i PUE;
nasana mpuꞌu tau to nekalendu ri jaꞌi-Na!
10 Umba komi todea-Na to nagasa katuwu, pekoumo ri jaꞌi PUE,
sabana tau to nekou ri jaꞌi-Na daꞌa ria nakura nuapa-nuapa.
11 Singa-singa naroso woꞌu naoro sabana nakura panggonina,
tapi tau to nanjarumaka i PUE daꞌa ria nakura nuapa-nuapa.
12 Kamaimo ngana-ngana, epemo tesaku,
komi kana kupatuduki mekou ri jaꞌi PUE.
13 Ane komi madota mandate umuru,
bo mombarasai to nabelona,
14 neꞌe mombasuwuraka tesa-tesa njilaka,
bo neꞌe mompokono mebagiu.
15 Neꞌe mana mowia to najaꞌana, kawiamo to nabelona,
pasimbukumo matuwu mosinggabelo ante mpuꞌu-mpuꞌu rara.
16 PUE nompariarantaꞌi tau to nanoa,
bo niepe-Na ane ira nekakai nerapi tulungi.
17 Tapi tau to nowia jaꞌa niewa-Na;
ane ira mamate, nasalisa nikalinga ri dunia.
18 Ane tau nanoa nekakai, nipetalinga-Na,
pade nipakasalama-Na ira nggari mpengele-ngele kasusa.
19 PUE namosu ante tau to nagero rarana,
bo nipakasalama-Na tau to naopu rarana.
20 Nadea kasusa ntau nanoa,
tapi PUE nanggabasaka iꞌa nggari pura-pura kasusa etu.
21 Korona batena nijagai PUE,
daꞌa ntoto ria sampeka wukuna nakoto.
22 Tau-tau najaꞌa kana mamate sabana kajaꞌana;
tau to nomporau tau to nanoa kana rasuku.
23 PUE nompakasalama batua-batua-Na;
tau-tau to nekalendu ri jaꞌi-Na daꞌa ntoto rasuku.