Dade mantoiya Alatala
33
Umba komi tau-tau to nagasa katuwuna,pakadamba-dambamo mantoiya i Pue.
Tau-tau nanoa masipato mombatoiya Iꞌa.
2 Posukurumo ri jaꞌi PUE ante mokanda kacapi,
podademo ka Iꞌa ante mompake gambusu.
3 Podademo dade to nabou ka i PUE,
kandamo kacapi mpakabelo-belo,
bo toiyamo Iꞌa ante madamba-damba!
4 Pura-pura tesa i PUE nakono;
pura-pura powia-Na nompakanoto Iꞌa namala raparasaya.
5 Nipodamba-Na to nakono bo nanoa;
njumaongu dunia naponu ante towe-Na to daꞌa ria kaopu-opuna.
6 PUE nompajadi langi ante tesa-Na;
Iꞌa nompajadi eo, wula bo betuꞌe ante tesa-Na.
7 Iꞌa nompakasalibo ue ntasi ewa ue niwusu,
pade ue bete niboli-Na ri petoꞌona.
8 Njumaongu isi dunia kana mekou ri jaꞌi PUE,
bo pura-pura manusia kana maeka ri jaꞌi-Na.
9 Sabana ante tesa-Na pura-pura nipajadi-Na;
ante parenta-Na, pura-pura naria.
10 PUE daꞌa nompaloga nia tau-tau ri dunia najadi,
bo nombagero nia ira.
11 Tapi nia i PUE batena najadi sampe ri kasae-saena;
nia-Na naroo sampe ri muli nu muli.
12 Nasana mpuꞌu todea to nombasomba PUE Alatala;
nadamba mpuꞌu tau-tau to nipelisi-Na najadi todea-Na!
13 Nggari suruga i PUE nompetiro,
nanggita pura-pura manusia.
14 Nggari petoꞌo-Na ri suruga Iꞌa nompariarantaꞌi
pura-pura tau netoꞌo ri dunia.
15 Iꞌamo to nompajadi rara ntaꞌi ira,
bo nanginjani pura-pura pokainggu ira.
16 Magau padagi daꞌa sabana tantarana nadea,
tadulako nasalama daꞌa sabana karosona.
17 Jara daꞌa namala rasarumaka mombarata padagi;
naupa jara naroso mpuꞌu, daꞌa namala mompakasalama.
18 Tapi PUE nombajagai tau-tau to nekou ri jaꞌi-Na
bo nanjarumaka towe-Na to daꞌa ria kaopu-opuna.
19 Iꞌa nompakasalama ira nggari kamatea,
bo nompiara katuwu ira ri tempo kamateoro.
20 Kita nanjarumaka i PUE,
Iꞌamo Topantulungi bo Topanjaliku kita.
21 Kita nadamba-damba sabana powia-Na,
bo nomparasaya sanga-Na to nagasa.
22 O PUE, perapi Komi batena mompotowe kami,
ewa kami nanjarumaka Komi.