Nasana mpuꞌu tau to niampungi silakana
32
Dade pepatuduki nggari jaꞌi Daud.Nasana mpuꞌu tau to niampungi kasalana,
bo silakana nipakalipo.
2 Nasana mpuꞌu tau to mana nireke i PUE kasalana,
bo daꞌa ntoto nipokonona nebagiu.
3 Tempo aku daꞌa nompangaku salaku, nalente mpuꞌumo wukuku,
njineo ntua aku nekakai.
4 PUE, eo wengi Komi nompandasa aku,
mana ria karosoku nasimbayu ewa bunga nalele tempo eo mpane.
5 Silakaku nipangakuku ri jaꞌi-Mu,
bo kasalaku daꞌa nitabuniakaku.
Niuliku, “Aku kana mompangaku salaku ri jaꞌi PUE,”
pade Komi nombaampungi pura-pura silakaku.
6 Sabana etu butu mbaꞌa tau to natutu nomparasaya
kana mosambaya ri jaꞌi-Mu tempo mombarasai kasusa,a
ala ane marata kasusa bete,
daꞌa mawela iꞌa.
7 Komimo petoꞌo pekalenduku,
nikabasaka-Mu aku nggari kasusa.
Jadi aku nodade nadamba-damba,
sabana Komi nombajagai bo nompakasalama aku.
8 Nangulimo i PUE, “Aku kana mompakanoto jala to mutuki;
iko kana Kunini bo Kupatuduki,
bo mombajagai iko ala batena maꞌama.
9 Neꞌe iko moinggu ewa jara to daꞌa ria akalana,
aga nisama bo niumbu ante kaloro pade madota metuki.”
10 Nadea kasusa nirata ntau najaꞌa,
tapi tau to nanjarumaka i PUE
batena nikalendu-Na ante towe-Na to daꞌa ria kaopu-opuna.
11 Umba komi tau-tau to nanoa, pakadamba-damba bo posukurumo
sabana powia i PUE.
Umba komi pura-pura tau to nabelo,
pongaremo mantoiya i PUE ante madamba-damba.