Nanjarumaka Alatala
31
Dade i Daud ka topopalu dade.2 O PUE, aku mekalendu ri jaꞌi-Mu.
Neꞌe ntoto rapakamba aku rapakaeya.
Pakasalamamo aku sabana Komi batena nanoa.
3 Epemo aku
bo pakasalisamo manggabasaka aku!
Kalendumo aku ewa bulu watu nanggalendu tau,
ewa wala to naroso nompakasalama aku!
4 Komimo ewa bulu watu bo walaku to naroso!
Nini bo keniakamo aku ala sanga-Mu ratoiya ntau.
5 Kabasakamo aku nggari nia jaꞌa ntau ewa tandoko to nitaꞌa ka aku,
sabana Komi nanggalendu aku.
6 O PUE, Alatala to namala raparasaya,
kujujumo katuwuku riara mpale-Mu.
Komimo to nompakasalama aku.
7 Tau to nombasomba pue-pue ntanina to daꞌa ria gunana, niporau rara-Mu;
tapi aku nomparasaya i PUE.
8 Aku madamba-damba,
sabana Komi batena nompotowe aku.
Komi nanggita katuwuku nandasa,
bo nipariara ntaꞌi-Mu aku nasusa.
9 Aku daꞌa niwai-Mu riara mpale baliku,
tapi nipalamba-Mu aku nalai ri petoꞌo to naamana.
10 O PUE, poasi matamo aku,
sabana aku riara kasusa!
Nebanggamo mataku sabana notumangi,
nandasamo korobataku.
11 Kasusa rara nompakaopu katuwuku,
bo ponguaku nompakambuku umuruku.
Karosoku naopumo sabana kasalaku,
bo wuku-wukuku najadi nalente.
12 Aku nipongei pura-pura baliku;
wetu woꞌu pura-pura tau ri sinjori sapoku.
Pura-pura tau niposinjaniku natikaja nanggita kasusaku,
ira nangowa nalai ane nosintomu ka aku ri jala.
13 Aku nikalinga ewa tau namate,
bo najadi ewa mbara-mbara naposo.
14 Ri umba-umba naria to nompakaeka rara;
niepeku baliku nosiwawayo nantesa aku.
Ira nasintuwu nangewa aku,
bo nompowia nia mompatesi aku.
15 Tapi PUE, aku nomparasaya Komi;
aku nanguli, “Komimo Alatalaku.”
16 Katuwuku riara mpale-Mu;
kabasakamo aku nggariara mpale bali-baliku,
bo nggari tau-tau to nombaraga aku.
17 Perapi reme nggari jaꞌi-Mu mombawanta aku, batua-Mu;
pakasalamamo aku sabana towe-Mu to daꞌa ria kaopu-opuna.
18 O PUE, neꞌe rapakamba aku rapakaeya,
sabana aku nekakai ka Komi.
Tapi pakambamo tau najaꞌa rapakaeya,
bo mana motesa pade manaꞌu ri dunia ntomate.
19 Lamumo sumba pura-pura topodawa,
to nanguli sinjaꞌi tau nanoa ante nalanga rara.
20 Neliu mpuꞌu kabelo
to nipakasadia-Mu ka tau-tau to nekou ri jaꞌi-Mu.
Nabelo mpuꞌu to nipowia-Mu ka tau-tau to nekalendu ri jaꞌi-Mu
ri ngayo pura-pura manusia.
21 Nitabuniaka-Mu ira ri petoꞌo-Mu,
nggari akala tau najaꞌa.
Nijagai bo nikalendu-Mu ira,
nggari pebata nu bali ira.
22 Ratoiyamo i PUE!
Neliu mpuꞌu kabete towe-Na to daꞌa ria kaopu-opuna ri jaꞌiku
tempo aku nitiku bo nisuaki.
23 Tempo aku naingu, nipekiriku,
“Nitajiaka i PUEmo aku nggari ngayo-Na.”
Tapi niepe-Mu pomperapiku,
tempo aku nekakai ri jaꞌi-Mu.
24 Umba komi pura-pura todea Alatala, potowemo i PUE.
Iꞌa nanggalendu tau to natutu nantuki Iꞌa.
Tapi tau to nalanga rara nisuku-Na
ante pesuku to neliu nggatomo.
25 Umba komi pura-pura to nanjarumaka i PUE,
pakaroso bo pakaroomo raramu!