Posambaya posukuru
30
Dade i Daud. Dade tempo meosa Sapo Mpepue.2 O PUE, aku mantoiya Komi,
sabana Komi nompakasalama aku,
bo daꞌa nompakamba baliku nompongei-ngei aku.
3 PUE Alatalaku, aku nekakai nerapi tulungi ka Komi,
bo Komi nompakalino juꞌaku.
4 Komi nanggabasaka aku nggari kamatea,
bo daꞌa nompakamba aku namate.
5 Umba komi todea to natutu nomparasaya,
podademo dade-dade mantoiya i PUE,
toiyamo sanga-Na to nagasa.
6 Sabana rau rara i PUE aga sampalai lau,
tapi kabelo-Na maroo sampe ri kaopu katuwu.
Naupa njambengi ntua aku notumangi,
tapi ri tempo mpadondona aku nadamba.
7 Tempo nadamba aku nanguli,
“Aku daꞌa ntoto radagi!”
8 O PUE, tempo Komi nabelo rara ri jaꞌiku,
aku nipajadi-Mu ewa bulu to naroso.
Tapi tempo Komi daꞌa nompeili aku,
aku najadi naeka.
9 O PUE, aku nekakai ri jaꞌi-Mu,
bo merapi asi mata Pue Alatala.
10 Nangulimo aku, “Nuapa gunana ka Komi ane aku mamate,
bo manaꞌu riara dayo?
Daꞌa ria tomate mantoiya Komi
bo mompatolele Komi namala raparasaya.
11 O PUE, epe bo poasi matamo aku!
PUE, tulungimo aku!”
12 Tangiku nibali-Mu najadi kadamba rara,
kasusaku nisambei-Mu najadi kasana rara.
13 Jadi aku batena modade mantoiya i PUE,
bo daꞌa aga mekalino.
O PUE Alatalaku, aku kana mosukuru ri jaꞌi-Mu
sampe ri kasae-saena.