Suara i PUE nabaraka bo nakuasa
29
Dade i Daud.Umba komi pura-pura to netoꞌo ri suruga, toiyamo i PUE,
toiyamo kabete bo kakuasa-Na.
2 Toiyamo sanga i PUE to Neliu Nggabete,
potimbakotumo mombasomba Iꞌa ante mompake pakea mpodade.
3 Alatala to Neliu Nggakuasa nosuara ewa guntu ri bunggu ntasi;
suara-Na natiepe ri bunggu ue bete.
4 Suara i PUE nabaraka mpuꞌu,
neliu nggakuasa bo nagaya.
5 Suara i PUE nompakakoto kayu-kayu bete,
nompakapongga kayu-kayu bete ri Libanon.a
6 Bulu Libanon nikawia-Na nekawantu-wantu ewa ana japi,
bo Bulu Siryonb nekawantu-wantu ewa ana bengga.
7 Suara i PUE
nompoporea kila.
8 Suara i PUE nombagagoya karawa baina,
suara-Na nombagagoya karawa baina ri Kades.
9 Suara i PUE nompakalonju ana rusa,
bo nompakaronto tawa-tawa rampangale.
Ri tempo etu nekakaimo todea i PUE ri Sapo Mpepue,
“Toiyamo i PUE!”
10 PUE nakuasa nomparenta ue nanggabuntu,
Iꞌa nakuasa ewa Magau sampe ri kasae-saena.
11 Perapi PUE mombawai karoso ka todea-Na,
bo mompowia ira masana.