Posambaya merapi tulungi ri jaꞌi PUE
28
Dade i Daud.O PUE, Topanjaliku aku,
aku mekakai ri jaꞌi-Mu.
Epemo pekakaiku.
Ane Komi aga mekalino,
aku ewa tau to nanaꞌu riara dayo.
2 Epemo pomperapiku
ane aku mongare merapi tulungi,
bo mosambaya ante mangonggotaka pale
mantingayo sapo-Mu to nagasa.
3 Neꞌe mombasuku aku mosanggani ka tau nasilaka,
mosanggani ka tau to nowia kajaꞌana.
Tesa ira ka roa-roa namomi,
tapi rara ntaꞌi ira nawau mpuꞌu.
4 Sukumo ira sabana pokainggu ira.
Sukumo ira nantuki powia ira,
sabana kajaꞌa to nipowia ira.
Wai ka iramo pesuku to masipatona.
5 Ira daꞌa nomparibaꞌa powia i PUE,
bo nuapa to nikawia-Na.
Jadi Iꞌa kana mombasuku ira,
bo mompakaropu ira sampe kasae-saena.
6 Ratoiyamo i PUE,
sabana niepe-Namo pomperapiku.
7 PUE to nompakaroso bo nanggalendu aku.
Aku nomparasaya ri jaꞌi-Na bo aku nitulungi-Na.
Nadamba mpuꞌu raraku,
sampe aku nodade nosukuru ri jaꞌi-Na.
8 PUE nombawai karoso ka todea-Na.
Iꞌa nanggalendu bo nompakasalama magau to nipelisi-Na.
9 O PUE, pakasalamamo todea-Mu,
ganemo tau-tau to najadi bagia-Mu.
Poewumo ira,
bo jagaimo ira sampe ri kasae-saena.