Posambaya mantoiya Alatala sabana petulungi-Na
27
Dade i Daud.PUEmo remeku bo Topompakasalama aku,
daꞌa ria to kupokaeka rara.
PUEmo wala to kupekalendu,
daꞌa ria to kupowiora rara.
2 Ane aku rasuaki ntau najaꞌa to madota mompatesi aku,
baliku etu mbotomo matepasunu bo madungga.
3 Naupa aku ratatiku lunu nu bali to neliu nggadea,
aku daꞌa maeka.
Naupa aku raewa ntau riara posibali,
aku batena nomparasaya i PUE.
4 Aga sangele kuperapi ka i PUE,
eꞌimo kupodota:
maroo ri sapo i PUE sampe kaopu katuwuku,
ala manggita kabelo i PUE,
bo batena mombarasai pekeniaka-Na.
5 Aku nikalendu i PUE riara kasusa;
aku nitabuniaka-Na riara Tenda Mpepue,
bo nikeni-Na mpaka ri petoꞌo to naꞌamana.
6 Weꞌi-weꞌi nidagikumo bali ri ntaliliku.
Jadi ante mongare madamba-damba
aku mombawai pesomba posukuru riara Tenda Mpepue;
aku kana modade mantoiya i PUE.
7 O PUE, epemo ane aku mekakai ri jaꞌi-Mu,
poasi mata bo sonomo aku!
8 Komi nanguli ka aku, “Karatamo komi mombasomba Aku.”
Nesonomo aku, “Iyo PUE, aku kana marata mombasomba Komi.”
9 O Alatala Topompakasalama aku, neꞌe mantubengo aku,
neꞌe marau bo daꞌa mantarima batua-Mu eꞌi.
Komimo Topantulungi aku;
neꞌe mantijaka bo mompalasi aku.
10 Naupa indo umaku mompalasi aku,
tapi PUE batena mantarima aku.
11 O PUE, pakanoto ka akumo dota-Mu;
ninimo aku ri jala to nanoa,
sabana bali-baliku madota mompandasa aku.
12 Neꞌe rapakamba aku manawu riara mpale bali-baliku
to mangewa aku ante dawa bo pepararai.
13 Niparasayaku aku kana mombarasai kabelo i PUE
riara nggatuwuku ri dunia eꞌi.
14 Sarumakamo i PUE!
Pakaroso bo pakaroomo raramu!
Sarumaka mpuꞌumo ri jaꞌi PUE!