Posambaya tau to daꞌa naria salana
26
Dade i Daud.O PUE, pakatantumo aku eꞌi daꞌa nasala,
sabana aku natuwu ante rara nagasa.
Aga i PUE nisarumakaku,
daꞌa kamba sakedi kakini raraku.
2 O PUE, paresamo rara ntaꞌiku bo ujimo aku,
paresamo rara ntaꞌiku bo pekiriku.
3 Aku batena nantora towe-Mu to daꞌa ria kaopu-opuna,
bo batena nomparasaya ri jaꞌi-Mu.
4 Aku daꞌa madota masiromu ante topebagiu,
atau mowega ante tau timoni-moni nabelo.
5 Kasiromu tau najaꞌa nipowua mataku,
aku daꞌa ntoto mowega ka tau nadenggo rarana.
6 O PUE, aku nantinande pale tandaina aku daꞌa nasala,
pade aku nolumako nantalili meja mpesomba-Mu
7 ante nodade nosukuru,
bo nompatolele powia-Mu to nipogumaa.
8 O PUE, nipotoweku sapo petoꞌo-Mu,
petoꞌo tau mamala manggita kuasa bo kagaya-Mu.
9 Neꞌe aku rapatesi mosanggani-nggani ante tau nasilaka,
bo neꞌe rakaliaka nosaku mosanggani ante tau topepatesi.
10 Ira bate-batena nowia jaꞌa,
bo nasadia mantarima doi pesogo.
11 Tapi aku natuwu ante nanoa rara.
Poasi mata bo kabasakamo aku.
12 Ante iwetu maꞌamamo aku nggari kasusa,a
pade aku mantoiya i PUE riara kasiromu ntodea-Na.