Posambaya merapi ampu bo merapi rakalendu
25
Dade i Daud. aO PUE, aga ri jaꞌi-Mu aku mosambaya,
2 O Alatalaku, aga Komi niparasayaku!
Neꞌe rapakamba aku rapakaeya,
bo rapongei-ngei baliku.
3 Pura-pura tau to nomparasaya Komi daꞌa rapakaeya,
tapi to rapakaeya tau-tau nangewa Komi nau daꞌa ria saba.
4 O PUE, pakanotomo dota-Mu ka aku,
popanjanimo nuapa to masipato kukawia.
5 Ninimo bo patudukimo aku matuwu mantuki dota-Mu,
sabana Komimo Alatala to nompakasalama aku.
Njaneo ntua aku nanjarumaka Komi.
6 O PUE, toramo kabelo bo towe-Mu to daꞌa ria kaopu-opuna,
to nipakanoto-Mu nggari tempo nggaulu.
7 Neꞌe mana ratora silaka bo kasalaku tempo aku danamuda,
tapi toramo aku nantuki towe-Mu to daꞌa ria kaopu-opuna,
sabana kabelo rara-Mu.
8 PUE nabelo bo nanoa rara-Na,
jadi Iꞌa nompakanoto jala ka tau to nasilaka.
9 Ninini-Na tau to naede rarana nowia to nakonona,
bo nipatuduki-Na ka ira dota-Na.
10 Pue batena natowe
ka tau to nomparasaya janji bo atura-Na.
11 O PUE, ampungimo aku ala sanga-Mu ratoiya ntau.
naupa nabete mpuꞌu salaku.
12 PUE nompakanoto ka tau-tau to nekou ri jaꞌi-Na
jala to masipato ratuki ira.
13 Ira batena matuwu masana;
ana bo makumpu ira kana mombarata tana ntotuꞌa ira.
14 PUE nowega rapa ante tau to nekou ri jaꞌi-Na,
bo Iꞌa nompakanoto pojanji-Na ka ira.
15 Aku batena nanjarumaka petulungi PUE,
sabana Iꞌa nompakasalama aku nggari kasusa.
16 O PUE, pariara ntaꞌi bo poasi matamo aku,
sabana aku natuwu njambaꞌaku lau bo nipandasa.
17 Nantambai mpuꞌumo kasusa raraku!
Kabasakamo aku nggari kasusaku eꞌi.
18 Pariara ntaꞌimo kasusa bo kandasaku,
pade ampungimo pura-pura silakaku.
19 Kitamo nadea mpuꞌu baliku;
ira mpuꞌu-mpuꞌu najuꞌa rara ri jaꞌiku.
20 Jagai bo pakasalamamo aku,
ala aku daꞌa rapakaeya,
sabana aku nekalendu ri jaꞌi-Mu.
21 Perapi ingguku to nabelo bo kanoa raraku mombajagai aku,
sabana aku nanjarumaka Komi.
22 O Alatala, kabasakamo todea-Mu to Israel
nggari mpengele-ngele kasusana.