Posambaya bo dade tempo kasusa
22
Dade i Daud ka topopalu dade. Nipodade nantuki dade to nosanga ka “Rusa Ri Tempo Eo Nebulu.”2 O Alatalaku, Alatalaku,
nokuya Komi nompalasi aku?
Aku nekakai tapi Komi batena nakawao,
bo daꞌa nantulungi aku.
3 O Alatalaku, aku nekakai tempo ntongo eo,
tapi Komi batena nekalino.
Aku nosambaya tempo nggawengina,
tapi raraku daꞌa woꞌu nasana.
4 Naupa iwetu Komi batena Magau to Nagasa,
to nitoiya ntau to Israel.
5 Komi to nisarumaka totuꞌa kami nggaulu;
Komi nisarumaka ira pade ira nipakasalama-Mu.
6 Ira nekakai ri jai-Mu, pade ira nikabasaka-Mu;
ira nanjarumaka Komi, pade daꞌa nipakaeya ntau.
7 Tapi aku eꞌi ndoro, daꞌa manusia,
aku nipongei bo nisalai ntau dea.
8 Pura-pura tau nanggita aku nompongei aku,
nekamuiyaka bo nombagoya balengga.
9 Nangulimo ira, “Iꞌa nanjarumaka i PUE;
damo i PUE mombakabasaka iꞌa!
Ane iꞌa nipotowe i PUE,
damo i PUE mompakasalama iꞌa!”
10 Ante petulungi-Mu aku niote indoku ante nasalama,
bo nipakaꞌama-Mu aku ri bombara nu indoku.
11 Nompamula nggariara ntaꞌi indoku, Komimo Alatalaku.
Tempo aku dako nesuwu katuwuku naria mamimo riara mpale-Mu.
12 Neꞌe makawao nggari jaꞌiku, sabana namosumo kasusa,
pade daꞌa ria tau to metulungi.
13 Baliku ewa lunu japi nantatiku aku,
ewa japi to naila nggari bagia Basan ira nantalili aku.
14 Ira nasadia mompatesi aku,
ewa singa to nongao nasadia mesoko.
15 Karosoku naopu ewa ue to nakamburaka,
pura-pura wukuku nakabasaka nggari oyuna.
Rara ntaꞌiku nagonu ewa lili.
16 Karosoku mana ria, nasimbayu ewa kura tana to mana nipake;
jilaku nasintaka ri ngareku.
PUE, aku nipalasi-Mu ri bunggu nu sowu
ewa tomate.
17 Aku nitatiku lunu ntau najaꞌa;
ewa lunu nu asu ira nantalili aku.
Ira nantosu pale bo kadaku.
18 Pura-pura wukuku namala kureke,
aku nitara bo nipongei-ngei ira.
19 Ira nombabagi-bagi pakeaku,
ante nompenoa nowia nomoro ala mangala baju ndoeku.a
20 Tapi O PUE, neꞌe makawao nggari jaꞌiku.
Karatamo Komi masalisa mantulungi aku,
sabana Komimo to nompakaroso aku.
21 Pakasalamamo aku nggari tau madota mompatesi aku ante guma,
kabasakamo aku nggari bali-baliku to nasoa mpoasu.
22 Kabasakamo aku nggari bali-baliku
to naroso mpojapi bo nasoa mposinga.
Nisono Komimo posambayaku.
23 Powia-Mu kana kutesa ka sampesuwu-sampesuwuku;
riara kasiromu ntodea-Mu aku mantoiya Komi.
24 Umba komi to naeka ka i PUE, toiyamo Iꞌa!
Pura-pura muli Yakub, bilamo Iꞌa!
Pura-pura muli Israel, pekadedemo ri jaꞌi-Na!
25 Sabana Iꞌa daꞌa nombatege tau to nipandasa,
bo daꞌa nanjauru kasusana.
Iꞌa daꞌa nompisi mata nanggita tau etu,
tapi niepe-Na pekakai ira.
26 Ri tatongo kasiromu ntodea-Mu aku mantoiya Komi,
sabana mpengele-ngele to nikawia-Mu.
Ri ngayo ntodea to naeka ri jaꞌi-Mu,
kuwai pesomba to nijanjiku.
27 Tau nakasiasi kana manggoni sampe mabosu;
tau to narata ri jaꞌi PUE kana mantoiya Iꞌa.
Perapi ira masana sampe ri kasae-saena!
28 Pura-pura tau ri dunia kana mantora i PUE bo matingguli ri jaꞌi-Na,
tau-tau nggari njumaongu dunia kana marata motimbakotu mombasomba Iꞌa.
29 Sabana PUEmo to nakuasa majadi Magau,
Iꞌamo to nomparenta tau-tau nggari butu-butu ngata ri dunia.
30 Pura-pura tau to nasugi kana mekou ri jaꞌi-Na;
Pura-pura manusia to daꞌa matuwu mpeliu kana mekadede mombasomba Iꞌa.
31 Muli-muli tempo nggapurina kana mepue ka Pue Alatala,
Ira kana mompatolele powia-Na sampe ri muli nu muli.