Podade posukuru sabana magau padagi
21
Dad e i Daud ka topopalu dade.2 O PUE, nadamba rara magau sabana Komi nompakaroso iꞌa;
nadamba mpuꞌu rarana sabana i PUE nantulungi iꞌa nombadagi balina.
3 Komi nombawai nuapa to nikonoa rarana,
bo nompoiyo nuapa to niperapina.
4 Komi nantomunaka iꞌa ante rasi to nadeana,
bo nompataka songgo bulawa ri balenggana.
5 Iꞌa nerapi Komi nompiara katuwuna,
bo nipoiyo-Mu pomperapina etu,
ante umuru nandate sampe ri kasae-saena.
6 Iꞌa mpuꞌu-mpuꞌu nibila,
sabana Komi nantulungi iꞌa nombadagi balina.
Iꞌa nipajadi-Mu natolele bo nakuasa.
7 Niwai-Mu ka iꞌa rasi sampe ri kasae-saena;
nadamba mpuꞌumo rarana sabana Komi nosanggani ante iꞌa.
8 Magau nanjarumaka i PUE to Neliu Nggalanga,
iꞌa batena naroso noparenta,
sabana towe-Mu to daꞌa ria kaopu-opuna ri jaꞌina.
9 PUE, Komi kana manjoko pura-pura bali-Mu,
bo mompatundu pura-pura tau to nawua matana ka Komi.
10 Komi marata ewa apu to najela-jela,
ala mompalabu ira.
Ira kana rapakaropu ante rau rara-Mu,
bo apu to mompakaboa.
11 Nggari muli ira daꞌa ria to maboli,
sabana Komi kana mompatesi ira pura-pura.
12 Ane ira mompowia nia mangewa Komi,
akala ira daꞌa maria aselena.
13 Komi kana mompatoto pana-Mu ka ira,
sampe ira megoli mangowa malai.
14 O PUE, kami mantoiya Komi, sabana nabete kuasa-Mu;
kami modade mantoiya karoso-Mu.