Posambaya merapi ala magau padagi
20
Dade i Daud ka topopalu dade.2 Perapi PUE mombasono posambaya komi riara nggasusa;
perapi kuasa Alatala to nisomba Yakub manggalendu komi!
3 Perapi Iꞌa marata nggari Sapo-Na mantulungi komi,
bo marata nggari Bulu Sion mombasaro komi.
4 Perapi Iꞌa mantora pura-pura pesombamu,
bo mantarima pura-pura pesombamu to nitunu.
5 Perapi Iꞌa mombawai nuapa to nipodotamu,
bo mompowia pura-pura niamu moasele.
6 Jadi kami kana mongare madamba-damba sabana komi padagi,
bo mangonggotaka bandera-bandera ala mantoiya sanga Alatalata.a
Perapi PUE mompoiyo pura-pura pomperapimu.
7 Weꞌi-weꞌi ninjaniku i PUE nombawai kuasa ka magau to nipelisi-Na mombadagi bali-balina.
Nggari suruga to nagasa Iꞌa nompakasalama magau
ante kuasa-Na to nabete.
8 Naria tau nanjarumaka kareta mposibalina,
naria woꞌu nanjarumaka jarana.
Tapi kita nanjarumaka kuasa i PUE Alatalata.
9 Ira kana matepasunu bo madungga,
tapi kita kana membangu bo menggore ante maroso.
10 O PUE, tulungimo magau mombadagi bali-balina!
Sonomo kami tempo kami merapi tulungi.