Kabete i PUE riara powia-Na bo riara Atura-Na
19
Dade i Daud ka topopalu dade.Kuasa i PUE namala nikita riara powia-Na.
2 Langi nantesa kakuasa bo kagaya nu Alatala,
bo laerawa nompopokita powia-Na.
3 Eo-eo langi nompatolele kabete-Na,
bo wengi-wengi laerawa nompopokita kuasa-Na.
4 Naupa daꞌa ria tesa-tesa,
daꞌa ria suara natiepe,
5 tapi tewai ira natolele mpaka ri njumaongu dunia,
kareba etu napola sampe ri tampa nu dunia.
Alatala nompowia sapo ri langi,
majadi petoꞌo mata eo.
6 Kampadondona eo neonga,
ewa boti langgai nesuwu nggari tombina,
ewa tadulako to nadamba nompamula polumakona.
7 Iꞌa nolumako ri langi nompamula nggari tampana sampe ri tampana.
Daꞌa ria to daꞌa nawela kapanena.
Kabete i PUE riara Atura-Na
8 Atura i PUE daꞌa ntoto naria kakurana,
nompakasana rara.
Parenta i PUE namala raparasaya,
nombawai noto ka tau to daꞌapa nanoto.
9 Atura i PUE nakono,
nompakadamba rara.
Pantesa i PUE nanoa,
nompakanoto pekiri ntau.
10 Nekou ri jaꞌi PUE nabelo,
inggu etu daꞌa malipo sampe kasae-saena.
Atura i PUE namala raparasaya,
bo nanoa pura.
11 Atura i PUE neliu nggadea olina nggari bulawa to daꞌa ria galona,
bo neliu nggamomi nggari ue noa to natiti nggari pekana.
12 Batua-Mu nipopatora ante Atura-atura etu;
hadia to nadeana nipakasadia ka tau to natutu nantuki Atura etu.
13 Daꞌa ria tau to namala nanginjani salana mboto.
PUE, kabasakamo aku nggari kasala to daꞌa nitunggaiku.
14 Pakakawaomo aku nggari silaka to nitunggaiku,a
neꞌe rapakamba aku rakuasaina.
Ante iwetu aku daꞌa masala,
bo makabasaka nggari kasala bete.
15 O PUE, Komi Pekalenduku bo Topantolo aku.
Perapi tesa-tesa bo pompekiriku mompakadamba rara-Mu.