Dade posukuru i Daud
2 Sam. 22:1-51
18
Dade i Daud, batua i PUE ka topopalu dade. Nipodade ka i PUE tempo i Daud nikabasaka i PUE nggari Magau Saul bo nggari pura-pura balina.
2 O PUE, aku nompotowe Komi,
to nompakaroso aku.
3 PUE ewa wala to naroso,
petoꞌoku nekalendu.
Alatalaku ewa watu dapala to narosona,
petoꞌoku nekaulu.
Iꞌa ewa kaliawo nanggalendu aku,
bo nombajagai aku ala maꞌama nggari baliku.
4 Aku nekakai ka i PUE to masipato ratoiya,
pade aku nikabasaka-Na nggari bali-baliku.
5 Aku nitalili kasusa kamatea,
bo nawela kasusa to mepakamate.
6 Aku nitatiku kasusa kamatea,
tandoko mepakamate nitaꞌa ri ngayoku.
7 Riara kasusaku aku nekakai ka i PUE,
aku nekakai ka Alatalaku nerapi tulungi.
Nggari sapo-Na Iꞌa nangepe suaraku
bo nompariarantaꞌi pekakaiku.
8 Naopu etu dunia nogoya bo nolalete;
bulu-bulu nogoya bo noridi sampe ri tambena ntoto,a
sabana rau rara Alatala.
9 Sumoa nesuwu nggari bolo nu onge-Na,
apu nesuwu nggari sumba-Na
ante rutina najela-jela.
10 Langi nibingga-Na, pade nanaꞌumo Iꞌa
ante kulimu nggapu ri wayo nu kada-Na.
11 Iꞌa nembua nesawi malaeka to niuli Kerub;b
Iꞌa nentaya ri baꞌa mpoiri.
12 Iꞌa nanggalendu koro-Na ante rumau;
kulimu nggapu to nakumba nantalili Iꞌa.
13 Nggari reme ri ngayo-Na
nalipomo kulimu,
bo nesuwumo uja es bo ruti nu apu.
14 Pade i PUE nosuara ewa guntu nggari laerawa,
PUE to Neliu Nggalanga nompopoepe suara-Na.
15 Nikabasaka-Na wila-wila-Na
nomposipotatare bali-Na.
Mpanggani-ngganimo nipoporea-Na kila,
nompowia ira nangowa nalai.
16 Tambe ntasi natekita bo polampi dunia natebuka
tempo i PUE nombabunggaa bali-Na ante rau rara-Na.
17 Nggari kalangana niulunjaka-Na pale-Na;
nisoko-Na bo nitaja-Na aku
nggariara ue bete nanggabuntu to mepakamate.
18 Aku nipakasalama-Na nggari jaꞌi baliku to narosona,
bo nggari jaꞌi tau-tau to nanggarau aku,
sabana narosopa ira pade aku.
19 Ira nombabaga aku tempo aku nirata kasusa,
tapi i PUE nantulungi aku.
20 Iꞌa nanggabasaka aku nggari kasusa,
bo nompakasalama aku,
sabana aku nikonoa rara-Na.
21 PUE nombabalasi pokaingguku to nanoa;
Iꞌa nombagane aku sabana aku daꞌa nasala.
22 Aku nantuki parenta i PUE,
bo daꞌa nanjapuaka Alatalaku.
23 Pura-pura atura-Na nipariara ntaꞌiku,
parenta-parenta-Na daꞌa niliunakaku.
24 Aku daꞌa noinggu nasala ri jaꞌi-Na,
bo nombajagai koroku nggari kasala.
25 Jadi PUE nombabalasi pokaingguku to nanoa,
sabana ninjani-Na aku daꞌa nasala.
26 Ri jaꞌi ntau to natutu nomparasaya, Komi batena namala raparasaya;
bo ri jaꞌi ntau noinggu nabelo, Komi batena nabelo.
27 Ri jaꞌi ntau to natuwu nagasa, Komi batena nagasa,
tapi tau to najaꞌa nipobali-Mu.
28 Tau to naede rarana nipakasalama-Mu,
tapi tau to nalanga rarana nipakanawu-Mu.
29 Komi nompakareme katuwuku;
PUE Alatalaku nombawanta karumauku.
30 Komi nompakaroso aku mantingayo baliku to nadea;
ante petulungi Alatalaku nisuakiku petoꞌo pekalendu ira.
31 Powia Alatala nanoa pura,
janji PUE namala raparasaya.
Iꞌa ewa kaliawo ka pura-pura tau to nekalendu ri jaꞌi-Na.
32 Sabana aga sambaꞌa PUE Alatala;
aga Iꞌa Topanjaliku kita.
33 Iꞌamo Alatala to nompakaroso aku
bo nompakanoa jala nggatuwuku.
34 Nipakaroso-Na kadaku ewa kada nu rusa,
bo niwai-Na pompakule ka aku nenggore ri bulu to nalangana.
35 Nipatuduki-Na aku mosibali,
sampe aku namala nombadii lui nu pana to neliu nggaroso.c
36 PUE, Komimo to nanggalendu bo nompakasalama aku,
bo nombasaro aku ante kuasa-Mu;
aku najadi naroso sabana kabelo rara-Mu.
37 Nijagai-Mu petoꞌo pekanggoreku,
sampe aku daꞌa nadungga.
38 Niragaku baliku bo nidagiku ira;
aku daꞌa nenonto sampe ira naropu.
39 Nidagiku ira sampe mana namala neewa;
ira nadungga bo namate ri ngayoku.
40 Nipakaroso-Mu aku mosibali,
pade Komi nombadagi bali-baliku to mangewa aku.
41 Nipopalai-Mu baliku nggari jaꞌiku;
tau-tau nawua mata ri jaꞌiku nipatesiku.
42 Ira nongare nekitulungi, tapi daꞌa ria topantulungi,
ira nekakai ka i PUE, tapi daꞌa nisono-Na.
43 Ira nipakaoyaku ewa sowu to notamburarea,
bo nombalonggo-longgo ira ewa gege ri jala.
44 Komi nanggabasaka aku nggari tau-tau topesapuaka,
bo nompajadi aku nomparenta ngata-ngata.
Tau-tau to daꞌa ninjaniku najadi batuaku.
45 Tau-tau nggari ngata ntanina natundu ri jaꞌiku,
bo nekou ane nangepe parentaku.
46 Mana nabia ira neewa;
ira nolalete bo nesuwu nggari petoꞌo pekalendu ira.
47 Ninjaniku PUE natuwu! Kutoiya Topanjaliku aku!
Toiyamo kabete Alatala to nompakasalama aku!
48 Iꞌa nantulungi aku nombadagi bali-baliku.
Nipowia-Na tau-tau nggari ngata ntanina nekou ri jaꞌiku,
49 Nipakasalama-Na aku nggari bali-baliku.
PUE, nitulungi-Mu aku nombadagi bali-baliku,
nikalendu-Mu aku nggari tau-tau to nangaꞌe.
50 Jadi kutoiya Komi ri tatongo todea ri njumaongu dunia,
bo kupodade dade mantoiya sanga-Mu.
51 Alatala nombawai kuasa ka magau to nipelisi-Na nombadagi pura-pura balina.
Iꞌa batena nompotowe tau to nionggotaka-Na,
etumo i Daud bo muli-mulina
sampe ri kasae-saena.