Posambaya ntau to daꞌa naria salana
17
Posambaya i Daud.O PUE, epemo pekakaiku merapi ratangara ante nanoa;
pariara ntaꞌimo posambayaku;
petalingamo pomperapiku,
to nesuwu nggari sumba to daꞌa nebagiu.
2 Tulungi salikumo aku riara parakaraku,
kita Komimo to nakonona.
3 Ane Komi mombauji rara ntaꞌiku,
bo marata momparesa aku tempo nggawengina,
kana Munjani daꞌa ria to najaꞌa riara ntaꞌiku.
Nipakatantukumo daꞌa motesa njilaka.
4 Nitukikumo nuapa to niparenta-Mu,
bo daꞌa nipasialaku pokainggu ntau nangaꞌe
5 Aku batena nantuki walea nggada-Mu,
daꞌa ntoto aku neleli.
6 O Alatala, aku nekakai ri jaꞌi-Mu
sabana Komi nombasono aku.
Pariara ntaꞌimo aku,
bo epemo tesa-tesaku.
7 O Komi Topompakasalama tau-tau to nekalendu ri jaꞌi-Mu nggari bali-bali ira,
popokitamo towe-Mu to nipogumaa to daꞌa ria kaopu-opuna.
8 Piaramo aku ewa ongu mata-Mu mboto,
kalendumo aku ri kele nggapi-Mu.
9 Jagaimo aku nggari tau najaꞌa madota mombabaga aku
nggari bali to nombasuaki madota mompatesi aku.
10 Daꞌa ria asi mata ira;
ira aga notesa ante nasombo.
11 Ira nomai nangewa aku bo nantatiku aku,
nangelo loga ala mombadungganaka aku.
12 Ira ewa singa nanjoko sokona,
ewa singa to namudana nelawa ri petoꞌo to nakalinoa.
13 O PUE, kamaimo ewamo baliku bo dagimo ira.
Pakasalamamo aku ante guma-Mu nggari tau-tau to najaꞌa.
14 Kabasakamo aku ante kuasa-Mu
nggari tau-tau aga nompasiromu mbara-mbara ri dunia.
Sukumo ira ante kasusa
to nipakasadia-Mu ka ira.
Pakambamo ana bo makumpu ira woꞌu rasuku.a
15 Tapi aku kana manggita Komi,
sabana aku daꞌa nasala.
Tempo aku nembangu nadamba mpuꞌu raraku,
sabana PUE nosanggani ante aku.