Kasana rara ntau to nosanggani ante i PUE
16
Dade i Daud.O Alatala, jagaimo aku,
sabana aku nekalendu ri jaꞌi-Mu.
2 Aku notesa ka i PUE, “Komimo Pue to nisombaku;
daꞌa ria ntanina to nabelo ri jaꞌiku, aga Komi!”
3 Todea nu Alatala ri tana eꞌi,
iramo tau to nibila bo mpuꞌu-mpuꞌu nipokonoku.
4 Tau-tau to nompakoni pue-pue ntanina,
mantambai kasusa rarana.
Aku daꞌa mantuki ira mompakoni pue-pue etu;
nau aga manguli sanga ira, aku daꞌa madota.
5 O PUE, Komimo najadi bagia nabelo to nipakatantu ka aku;
Komi nombawai pura-pura to niparaluuku.
Komimo to nompakatantu jala nggatuwuku.
6 Nabelo mpuꞌu pewai-Mu ka aku,
mpuꞌu-mpuꞌu nompakadamba raraku.
7 Aku kana mantoiya i PUE to nompopatora aku.
Ri tempo nggawengina pekiri rara ntaꞌiku woꞌu nompatuduki aku.
8 Aku batena nanjarumaka i PUE nosanggani ante aku;
Iꞌa naria ri pangganaku, jadi aku daꞌa nolengga.
9 Sabana etu rara ntaꞌiku nadamba-damba bo pekiriku nasana.
Pade koroku kana mangosaraka ante masana,
10 sabana Komi daꞌa mompalamba aku malau ri dunia ntomate;
tau to nipotowe-Mu daꞌa Mupakamba mamate.
11 Nipakanoto-Mu ka aku jala mombarata katuwua nabelo.
Ri jaꞌi-Mu neliu nggadamba raraku,
ri panggana-Mu nasana mpuꞌu raraku sampe ri kasae-saena.