Tau to masipato metoꞌo mpasanggani ante i PUE
15
Dade i Daud.O PUE, isema mamala mesai maturu riara tenda-Mu?
Isema mamala metoꞌo ri bulu-Mu to nagasa?a
2 Iramo tau to daꞌa nasala pokaingguna,
bo nowia to nanoana,
bo notesa to nakonona
ante nanoa rarana.
3 Iramo to daꞌa nompakajaꞌa tau ntanina,
daꞌa nowia jaꞌa ri jaꞌi roana,
bo daꞌa nompakawau sanga sanggamanusiana.
4 Iramo to daꞌa nombabila tau to daꞌa nitarima Alatala,
tapi nombabila tau to nekou ri jaꞌi Alatala;
to nompakadupa janji,
naupa narugi.
5 Iramo to nompopoinda doi daꞌa nosaro;
bo daꞌa nantarima doi pesogo ala mompakarugi tau to daꞌa nasala.
Tau to noinggu iwetu,
bate-batena matuwu maroso.