Mazmur 13

Posambaya tau to nipandasa

Dade i Daud ka topopalu dade.

2 O PUE, sakuyapa kasaena Komi manggalinga aku?

Sakuyapa kasaena Komi daꞌa mompeili aku?

3 Sakuyapa kasaena raraku mawulesa,

bo masusa njaneo ntua?

Sakuyapa kasaena aku rapatundu nu baliku?

4 O PUE Alatalaku, pariara ntaꞌimo aku,

bo sonomo posambayaku.

Pakaroso balimo wukuku,

bo neꞌe rapakamba aku mamate.

5 Neꞌe rapakamba baliku manguli,

“Nidagi kamimo iꞌa!”

Neꞌe rapakamba ira madamba-damba

ane aku manawu riara kasusa.

6 Tapi aku nanjarumaka towe-Mu to daꞌa ria kaopu-opuna;

aku kana madamba-damba, sabana Komi nompakasalama aku.

Aku madota modade mantoiya i PUE,

sabana Iꞌa nowia belo ri jaꞌiku!