Posambaya merapi tulungi ri jaꞌi PUE
12
Dade i Daud ka topopalu dade. Nantuki dade kawaluna.2 O PUE, tulungimo kami,
sabana mana ria tau to nabelona;
nalipo puramo tau to natutu nomparasaya Komi.
3 Pura-pura tau nosipodawa,
ira nosibagiu ante tesa-tesa to namomi.
4 O PUE, popenontomo tesa-tesa to netanara etu;
lamumo sumba tau-tau to nangoa,
5 to nanguli iweꞌi, “Kami padagi ante tesa kami!
Nuapa-nuapa namala rauli kami,
bo daꞌa ria sambaꞌa to namala mombasapuaka!”
6 Nangulimo i PUE, “Tau nakasiasi nipandasa,
bo tau napepa nerapi tulungi.
Jadi weꞌi-weꞌi Aku narata
manggalendu ira ewa to nipolentora ira.”
7 Janji PUE nakono pura pade namala nisarumaka,
ewa salaka daꞌa ria galona to niuji riara apu pitunggani.
8-9 O PUE, tau najaꞌa nanjayo-jayo ante nabia,
ane kajaꞌana nitoiya ntau.
Tapi Komi batena manggalendu kami;
Komi batena mombajagai kami nggari tau-tau najaꞌa etu.