Posambaya merapi tulungi ka i PUE mantingayo kajaꞌa ri dunia
10
O PUE, nokuya Komi nakawao?Nokuya Komi netabuni tempo kami nirata kasusa?
2 Ante kasombona tau najaꞌa nompandasa tau nakasiasi;
pakambamo ira rapakasusa nia jaꞌa ira mboto.
3 Tau najaꞌa nangoa nantesa dota rarana to najaꞌa;
tau nadoko doi nombajanjiaka bo nanguli sinjaꞌi PUE.
4 Tau najaꞌa daꞌa nantora i PUE;
ante nalanga rara nipekirina Alatala daꞌa ria.
5 Tau najaꞌa noasele riara pura-pura pokarajaana.
Atura-atura i PUE daꞌa nitukina,
bo iꞌa nanjauru pura-pura balina.
6 Notesamo iꞌa riara ntaꞌina, “Aku kana batena maroso,
bo daꞌa mombarata kasusa sampe ri muli nu muli.”
7 Iꞌa bate-batena nejanjiaka, nepararai bo nebagiu;
tesa-tesana naponu pura ante rau rara bo kajaꞌana.
8-9 Iꞌa netabuni ri ngata-ngata,
bo mompatesi tau to daꞌa ria salana.
Iꞌa ewa singa nompopea ranggawoko,
nantingawu tau nakasiasi ri petoꞌo nakalinoa.
Ira nisokona bo niumbunjaina
nikeni mpalai.
10 Nekadedemo iꞌa masadia mombasoko;
nidungganakana tau ante nakasara.
11 Nipekirina, “Nikalinga Alatalamo bo mana nipariara ntaꞌi-Na powiaku.
Sampe ri kasae-saena daꞌa rakita-Na aku!”
12 O PUE, karatamo bo sukumo tau-tau najaꞌa!
Toramo tau to nipandasa!
13 Nokuya tau najaꞌa bate-batena nanjalai Alatala,
bo nompekiri Alatala daꞌa mombasuku iꞌa?
14 Tapi Komi nanggita pura-pura to najadi;
nipariara ntaꞌi-Mu tau nasusa bo nandasa,
bo bate-batena nasadia mantulungi ira.
Tau to nasusa bate-batena nombajuju katuwu ira ri jaꞌi-Mu,
ngana pailu bate-batena nitulungi-Mu.a
15 Pakalipomo kakuasa tau najaꞌa bo nasilaka;
sukumo ira sabana powia ira,
sampe ira mana ntoto mowia majaꞌa.
16 PUE noparenta sampe ri kasae-saena;
Tau-tau topesowo to daꞌa nomparasaya Iꞌa
kana maropu nggari tana i PUE.
17 O PUE, Komi nangepe posambaya tau nakasiasi,
bo nompakaroso rara ira.
18 Ngana pailu bo tau to nipandasa nisaliku Komi parakarana,
ala mana ria tau ri dunia mompakaeka ira.