Posambaya posukuru sabana petulungi i PUE
9
Dade i Daud ka topopalu dade. Nipodade nantuki dade to nosanga ka “Mut-Laben.”2 Aku kana mosukuru ri jaꞌi PUE ante mpuꞌu-mpuꞌu rara,
bo mompatolele powia-Mu to nipogumaa.
3 O Alatala to Neliu Nggalanga, aku kana madamba-damba sabana powia-Mu,
bo modade mantoiya sanga-Mu.
4 Baliku negoli bo nangowa nalai;
ira nadungga natepasunu bo namate ri ngayo-Mu.
5 Sabana Komi noparenta ewa topotangara to nanoana;
Komi nombatangara parakaraku tapi daꞌa nirata Komi salaku.
6 Komi nombasuku todea to daꞌa nosinjani ante Komi,
bo nompakaropu tau-tau najaꞌa.
Nipakalipo-Mu sanga ira
sampe ri kasae-saena.
7 Bali kami naopumo nipatesi,
naropu sampe ri kasae-saena.
Kota-kota ira nipakagero-Mu;
mana ria to nombatora ira.
8 Tapi PUE noparenta sampe ri kasae-saena;
nasadiamo Iꞌa mantangara manusia ri dunia.
9 Iꞌa noparenta ri dunia ante nanoa,
bo nantangara manusia ante daꞌa nanggita lenje.
10 PUE petoꞌo pekalendu tau to nipandasa,
petoꞌo pekaulu ri tempo kasusa.
11 O PUE, tau to nosinjani belo ante Komi nanjarumaka Komi,
tau to nepue ka Komi daꞌa ntoto nipalasi-Mu.
12 Toiyamo i PUE to noparenta ri Bulu Sion!a
Tesamo powia-Na ka todea ri njumaongu dunia!
13 Sabana nitora-Na tau to nipandasa,
bo daꞌa nikalinga-Na pekakai ira.
Tau to nompatesi ira nibalasi-Na.
14 O PUE, poasi matamo aku;
kitamo aku nipandasa baliku.
Kabasakamo aku nggari kamate,
15 ala aku mamala mantesa powia-Mu to masipato ratoiya
ri ngayo ntodea ri Yerusalem.
Aku kana madamba mpuꞌu,
sabana Komi nompakasalama aku.
16 Tau-tau to daꞌa nanginjani Komi
nanawu riara lowu to nikae ira mboto;
kada ira nisoꞌo pasalo to nitaꞌa ira mboto.
17 PUE nompopanjani koro-Na ante potangara-Na to nanoa.
Tau najaꞌa nipakanawu powia ira mboto.
18 Kaopu katuwu tau-tau najaꞌa kamatea,
etumo todea nggari njumaongu dunia to daꞌa madota nantuki dota Alatala.
19 Tapi tau nakasiasi daꞌa rakalinga Alatala sampe ri kasae-saena
bo tau nandasa daꞌa rapalamba-Na maopu rara.
20 O PUE, kamai tangaramo manusia,
neꞌe rapakamba todea ri pura-pura ngata mompakalanga rara ira.
21 O PUE, pakambamo ira majadi maeka,
ala manoto ira etu aga manusia.