Alatala nombawai ka manusia kuasa bo pebila
8
Dade i Daud ka topopalu dade. Nipodade nantuki dade to nosanga ka “Gitit.”2 O PUE, Pue Alatala kami,
sanga-Mu natolele ri njumaongu dunia!
Kabete kuasa-Mu neliu nggalanga nggari langi.
3 Komi nompatuduki ngana-ngana bo ngana danantomi nantoiya sanga-Mu,
sampe poparenta-Mu naroso bo daꞌa nogoya,
pade pura-pura bali-Mu daꞌa nenggepe.
4 Ane kukita langi to nipajadi-Mu,
wula bo betuꞌe-betuꞌe to niboli-Mu ri langi, aku nekutana,
5 “Sema manusia sampe nitora-Mu,
sema tanu manusia sampe nipiara-Mu?”
6 Iꞌa nionggotaka-Mu ntora nasimbayu ewa Alatala,
bo niwai-Mu ka iꞌa kuasa bo pebila.
7 Niwai-Mu ka iꞌa kuasa mombakuasai pura-pura nuapa to nipajadi-Mu.
Pura-pura to nipowia-Mu nipakatundu-Mu ri jaꞌina:
8 bimba, japi bo pura-pura binata to nipiara,
binata ranggayu,
9 tonji-tonji ri laerawa bo bau-bau,
bo pura-pura to natuwu riara ntasi.
10 O PUE, Pue Alatala kami,
sanga-Mu natolele ri njumaongu dunia!