Posambaya merapi potangara to nanoa
7
Dade kasusa rara i Daud, nipodadena ka i PUE sabana nantora pokainggu i Kus, muli Benyamin.2 O PUE Alatalaku, aku nekalendu ri jai-Mu;
pakasalamamo bo kabasakamo aku
nggari pura-pura tau to nombaraga aku.
3 Neꞌe rapakamba ira ewa singa
mombabaga bo mombaseri-seri aku,
pade daꞌa ria to mantulungi aku.
4-5 O PUE Alatalaku, ane rapana aku majeko,
bara mowia jaꞌa ri jaꞌi wegaku,
atau mompakarugi baliku nau daꞌa ria salana,
6 pakambamo aku raraga bo rasoko nu baliku,
pade rapatesi bo rapalamba ri tana.
7 O PUE, suwurakamo rau rara-Mu,
ewamo rau rara nu bali-baliku.
Kamaimo mantulungi aku,
sabana Komi to nombatangara manusia.
8 Pasiromumo todea nggari njumaongu dunia ri sinjori-Mu,
bo parentamo ira nggari petoꞌo-Mu ri suruga.
9 O PUE, Komi topotangara manusia.
Tangaramo aku, sabana pokaingguku nanoa,
bo daꞌa ria salaku.
10 Popenontomo kajaꞌa ntau to nasilaka,
bo pakaroso rara ntau to nanoana,
sabana Komi Alatala to nanoana,
to nomparesa bo nanginjani rara ntaꞌi bo pekiri manusia.
11 Alatala ewa kaliawo to nipekalenduku,
Iꞌa nompakasalama tau to nanoa rarana.
12 Alatalamo topotangara to nanoana,
Iꞌa nombasuku tau najaꞌa ri butu-butu eo.
13-14 Ane inggu ira daꞌa mabali,
Iꞌa nasadia mompatesi ira ante parewa mposibali to mepakamate.
Iꞌa kana mombasampu guma-Na bo mombadii pana-Na,
bo mompatoto wila-wila-Na to najela.
15 Kitamo, tau najaꞌa nonia najaꞌa;
iꞌa nowia nia jaꞌa bo nebagiu.
16 Iꞌa nombakae lowu ka tau ntanina,
tapi iꞌa mboto nanawu riarana.
17 Jadi iꞌa nisuku ante kajaꞌana mboto,
bo nipandasa ante kasoana mboto.
18 Aku mosukuru ka i PUE sabana Iꞌa nanoa,
aku modade mantoiya i PUE to Neliu Nggalanga.