Posambaya riara kasusa
6
Dade i Daud ka topopalu dade. Nipodade ante nokanda kacapi. Nantuki dade kawaluna.2 O PUE, neꞌe mompandasa aku ante gigi rara-Mu,
neꞌe mombasuku aku ante rau rara-Mu.
3 O PUE, poasi matamo aku sabana mana ria karosoku;
pakarosomo aku sabana nalentemo wukuku.
4 O PUE, naingu mpuꞌu raraku;
sakuyapa kasaena aku mandasa ewa eꞌi?
5 O PUE, patinggulimo ri jaꞌiku, kabasakamo aku,
bo pakasalamamo aku sabana aku nipotowe-Mu./sabana towe-Mu daꞌa ria kaopu-opuna.
6 Sabana Komi mana ratora ri dunia ntomate;
mana ria tau mantoiya Komi riara dayo.
7 Aku nekakai ante susa rara sampe nalenge mpuꞌu.
Wengi-wengi ue mataku noili nompakasii paturuku.
8 Mataku nebangga nageo sabana nasusa raraku,
mataku nambuleisaka nageo sabana pesalai nu bali-baliku.
9 Palaimo komi tau-tau najaꞌa,
sabana niepe i PUEmo aku notumangi.
10 Niepe i PUEmo pomperapiku,
bo nitarima-Na posambayaku.
11 Pura-pura baliku kana matikaja bo maeya mata.
Ira masalisa-lisa mokanggaura bo maeya mboto matana.