Posambaya merapi rakalendu nggari jaꞌi bali
5
Dade i Daud ka topopalu dade. Nipodade ante nantawui sasuli.2 O PUE, epemo tesaku,
pariara ntaꞌimo pekakaiku.
3 O Magauku bo Alatalaku, epemo pekakaiku tempo aku merapi tulungi,
sabana aga ri jaꞌi-Mu, PUE, aku nosambaya.
4 O PUE, tempo mpadondona Komi nangepe pekakaiku;
tempo mpadondona aku nanggeni pesombaku ka Komi,
bo nompopea pesono-Mu.
5 Sabana Komi Alatala to daꞌa nompokono kajaꞌana;
tau najaꞌa daꞌa namala mesai ri jaꞌi-Mu.
6 Tau nasombo daꞌa namala mantingayo Komi;
tau nowia kajaꞌana nipowua mata-Mu.
7 Nipakaropu-Mu tau-tau to nabiasa nodawa;
nawua mpuꞌu mata-Mu nanggita topebagiu bo topepatesi.
8 Tapi aku mamala mesua riara sapo-Mu,
sabana nabete mpuꞌu towe-Mu ri jaꞌiku.
Aku motimbakotu mantingayo sapo-Mu to nagasa,
bo mombasomba Komi ante mekou ri jaꞌi-Mu.
9 O PUE, ninimo aku mantuki dota-Mu,
bo pakanoamo jala-Mu to masipato kutuki,
sabana nadea mpuꞌu baliku!
10 Sabana tesa nu baliku daꞌa namala raparasaya,
rara ntaꞌi ira naponu ante nia jaꞌa.
Tesa-tesa ira nawau mpuꞌu nasimbayu ewa dayo ntomate to natebuka;
tesa bagiu nesuwu nggari jila ira.
11 O Alatala, sukumo ira,
waikamo ira rapakasusa nia jaꞌa ira mboto.
Pasumamo ira sabana nadea gaga sala ira,
apa ira nangewa Komi.
12 Tapi perapi pura-pura tau to mekalendu ri jaꞌi-Mu madamba-damba,
perapi ira modade mpakadamba-damba sampe ri kasae-saena.
Kalendumo tau-tau to nompotowe Komi,
ala ira madamba-damba sabana powia-Mu.
13 Sabana Komimo to nombawai rasi ka tau to nanoa,
Komi nanggalendu ira ante towe belo-Mu nasimbayu ewa kaliawo.