Magau to nipelisi Alatala
2
Nokuya tau-tau ri dunia nasintuwu nowia gado,bo nompowia nia to daꞌa ria gunana?
2 Magau-magau ri dunia nosaongu rara,
bo pura-pura topoparenta nasintuwu
mangewa i PUE bo magau to nipelisi-Na.a
3 Topoparenta-topoparenta etu nanguli,
“Kamaimo kita mangewa poparenta ira
bo manggabasaka korota nggari kuasa ira!”
4 Nggari petoꞌo-Na ri suruga i PUE nongiri
bo nompongei-ngei nia topoparenta-topoparenta etu.
5 Pade nibunggaa-Na ira ante rau rara-Na,
bo nipakatikaja-Na ira ante belisi rara-Na.
6 Niuli-Na, “Ri Sion;b bulu-Ku to nagasa;c
naopumo nilanti-Ku magau to nipelisi-Ku.”
7 Nangulimo magau to nilanti etu, “Aku kana mompatolele nuapa to nipakatantu i PUE.
Niuli-Na ka aku iweꞌi: “Ikomo ana-Ku langgai,
eo eꞌi Akumo najadi Umamu.d
8 Perapimo ri jaꞌi-Ku pade todea nggari pura-pura ngata kana Kuwai ka iko,
bo njumaongu dunia kana Kupajadi bagiamu.
9 Ira kana muboba mpakakoto ante pato ase,
bo mupakaposo ewa kura tana.”
10 Jadi umba komi magau-magau, pakanotomo raramu,
bo umba komi topoparenta-topoparenta ri dunia, pariara ntaꞌimo pepatora eꞌi!
11 Pepuemo ka i PUE ante maeka rara,
12 pekadedemo ri ngayo-Na ante molalete.
Neꞌe sampe Iꞌa marau bo komi mamate riara sampida mata,
sabana rau rara-Na meomba ante daꞌa ninjani-njani.
Nasana mpuꞌu tau
to nekalendu ri jaꞌi PUE!