Ezra nosambaya nompangaku silaka tau-tau to Israel
9
Naopu pura-pura etu nipowia, naratamo totuꞌa-totuꞌa ngata nto Israel nosirata ka aku pade nanguli, “Todea Israel, topanggeni-topanggeni agama bo tau-tau to Lewi daꞌa nogaꞌa ka tau-tau to netoꞌo ri bagia eꞌi to natantoru pokainggu ira. Ira etu tau to Kanaan, tau to Het, tau to Feris, tau to Yebus, tau to Amon, tau to Moab, tau to Masir bo tau to Amori. 2 Tau-tau to Israel nangala randoo-randoo nggari tau-tau etu ala majadi rongo ira mboto bo rongo ana-ana ira woꞌu. Jadi todea Alatala to nagasa nosigalomo ante tau daꞌa to Yahudi nggari ngata-ngata etu. Pade totuꞌa-totuꞌa ngata bo topanggeniaka-topanggeniaka to nompamula nompowia powia to nanjapuaka Atura-atura Alatala etu.”3 Tempo aku nangepe pantesa ira etu, niseri-serikumo pakea bo baju nggumbaku ante nasusa rara. Pade nirebukumo janggoku bo woꞌo nggari balenggaku,a pade nekatoko ante natikaja bo nagero rara. 4 Naopu etu pura-pura tau to natutu nantuki Tesa nu Alatala nto Israel nasiromu nantalili aku ante naeka nantora silaka to nipowia tau-tau to nanjili nggari petoꞌo ira nipobatua etu. Tapi aku batena nekatoko ante natekaja bo nagero rara sampe tempo pesomba ngguwiana.
5 Ri tempo pesomba ngguwiana, nembangumo aku pade nenontomo nompandasa koroku. Pade ante pakea bo baju nggumbaku to naseri-seri notimbakotumo aku ante nangonggotaka paleku ri ngayo i Pue Alatala. 6 Pade nosambayamo aku, “O Alatalaku, naeya mpuꞌumo mataku sampe daꞌa nabia aku mantingoa ri jaꞌi-Mu, sabana nadea mpuꞌu silaka kami, bo neliu nggadea mpuꞌumo kajaꞌa kami. 7 Nompamula nggari tempo totuꞌa kami nggaulu sampe weꞌi-weꞌi, nadea mpuꞌu kasala kami. Nggari silaka kami etu, kami ante magau-magau bo topanggeni-topanggeni agama kami niwai riara mpale magau-magau ri ngata ntanina. Kami nipatesi, nipatani ri petoꞌo nipobatua, mbara-mbara kami niala ntaumo, pade kami nipakaeya mpuꞌu, ewa to najadi sampe weꞌi-weꞌi.
8 Tapi weꞌi-weꞌi nggari asi mata-Mu nikabasaka-Mu sabagia nggari kami pade niwai-Mu ka kami petoꞌo rapetoꞌo kami ri tana-Mu to nagasa eꞌi. Pade nipakadota-Mu rara kami bo nipakangaꞌa-Mu katuwu kami to nipobatua ntau. 9 Naupa kami eꞌi najadi batua, Pue daꞌa nompalasi kami. Tapi Pue nompowia kami nipoasi mata magau-magau Persia, sampe kami nombarata loga mombabangu mpanjili Sapo Mpepue to nagerona, bo mompakabelo mpanjili petoꞌona to nagero. Pade niwai-Mu ka kami petoꞌo pekalendu ri Bagia Yehuda bo Kota Yerusalem.
10 Tapi O Pue Alatala, naupa iwetu, nuapamo to mamala rauli kami weꞌi-weꞌi? Kami mana nantuki parenta-Mu 11 to niparenta-Mu ka kami nantuki tesa to nipasimbayu batua-batua-Mu nabi-nabi. Nitesa-Mu iweꞌi: ‘Tana to rakalau komi majadi petoꞌo komi, natantumo natantoru mpuꞌu sabana pokainggu tau-tau ri setu natantoru bo najaꞌa mpuꞌu. Ante pokainggu ira to nompakarunggu rara, bagia to nipetoꞌo ira najadi natantoru pura, ri umba-umba ri tana etu. 12 Sabana etu, neꞌe komi mombawai ana-ana besi komi raporongo ana-ana ira langgai, pade neꞌe woꞌu mangala ana-ana besi ira raporongo ana-ana komi langgai. Neꞌe komi mantulungi ira matuwu mabelo bo masana sampe ri kasae-saena, ala komi majadi maroso bo mombarata asele ntana to nabelona, pade mombawai tana etu ka ana-anamu majadi bagia ira sampe ri kasae-saena.’
13 O Alatala kami, nuapa to najadi ri jaꞌi kami etumo pesuku sabana pokainggu kami to najaꞌa bo kasala kami to nabete mpuꞌu. Tapi Pue daꞌa nombasuku kami ante pesuku to masipato ante kasala kami etu. Daꞌa aga etu, tapi niboli-Mu ka kami tau-tau nadea eꞌi to nikabasaka nggari petoꞌo ira nipobatua. 14 Jadi rapokuya kami manjili mombaliunaka parenta-Mu bo mosiporongo ante tau-tau to najaꞌa eꞌi? Ane etu rapowia kami natantumo Komi kana mabilisi ri jaꞌi kami, sampe kami kana rapakaropu pade mana maria to mabolina. 15 O PUE Alatala nto Israel, Komi mpuꞌu-mpuꞌu nanoa, sabana kami danipakamba-Mu makabasaka nggari petoꞌo kami nipobatua ewa to najadi weꞌi-weꞌi. Kitamo, kami mompangaku silaka kami ri ngayo-Mu. Daꞌa mamala kami menggore ri ngayo-Mu sabana silaka kami etu.”