Powia Ezra ka tau to nomporongo tau daꞌa to Yahudi
10
Tempo Ezra nosambaya bo nompangaku silaka ante notumangi bo notimbakotu ri ngayo Sapo Mpepue, nadea mpuꞌu todea Israel nasiromu ri ntalilina, nabelo ka langgai, nabelo ka besi bo ngana-ngana. Todea etu woꞌu notumangi ante nasusa mpuꞌu rara. 2 Naopu etu nangulimo i Sekhanya ana Yehiel muli Elam ka Ezra, “Kami nowia silaka ri jaꞌi Alatalata ante nomporongo besi-besi daꞌa to Yahudi nggari tatongo tau-tau to netoꞌo ri seꞌi. Naupa wetu danariapa panjarumaka ka tau to Israel. 3 Sabana etu kamaimo kita mowia pojanji ante Alatalata, ala mompopalai pura-pura rongo kami daꞌa to Yahudi nosanggani-nggani ante ngana-ngana to niote ira, nantuki pepatora komi bo tau-tau to natutu nantuki Tesa nu Alatalata. Etu kana rapowia nantuki Atura-atura Alatala. 4 Penggoremo, sabana komi to masipato mowia etu. Kami kana momporoa komi. Pakaroomo raramu, pade kawiamo etu!”5 Jadi nekanggoremo Ezra, pade nipakauna balengga-balengga topanggeni agama, tau-tau to Lewi, bo pura-pura tau to Israel nojanji ira kana mowia nuapa to niuli Sekhanya paneꞌa. Jadi nojanjimo ira. 6 Naopu etu nalaumo Ezra nggari ngayo Sapo Mpepue mpaka ri tombi Yohanan ana Elyasib pade noturu ri setu. Tempo iꞌa ri setu iꞌa daꞌa nanggoni roti bara nanginu ue sabana nasusa rarana nompekiri pokainggu najaꞌa tau-tau to Israel to nanjili nggari petoꞌo ira nipobatua.
7 Naopu etu nipatolelemo tesa ri njumaongu Bagia Yehuda bo Kota Yerusalem ala pura-pura tau to nanjili nggari petoꞌo ira nipobatua kana masiromu ri Kota Yerusalem. 8 Nantuki tesa topanggeniaka-topanggeniaka to Israel, isema-sema daꞌa marata riara tempo tolueo, pura-pura mbara-mbarana kana raala, pade iꞌa mboto mana rareke todea to Israel.
9 Jadi riara tolueo nasiromumo pura-pura tau to Yehuda bo Benyamin ri Kota Yerusalem ri tanggal rompulu wula sasio. Pura-pura todea nekatoko ri lalowo Sapo Mpepue ante nolalete sabana nantora kajadia etu bo nidunggu uja romba. 10 Naopu etu nekanggoremo Ezra topanggeni agama nanguli ka ira, “Komi daꞌa natutu nantuki parenta Alatala! Komi nomporongo besi-besi daꞌa to Yahudi sampe nantambai kasala nto Israel! 11 Weꞌi-weꞌi, pangakumo silakamu ri jaꞌi PUE Alatala to nisomba ntotuꞌamu, pade powiamo nuapa to nikonoa rara-Na. Pogaꞌamo komi nggari jaꞌi tau-tau daꞌa to Yahudi to netoꞌo ri tana eꞌi bo nggari jaꞌi rongo-rongo komi daꞌa to Yahudi etu!”
12 Nangepe etu nesonomo pura-pura todea etu ante suara nagai, “Iyo, Tua, kami kana mantuki nuapa to nitesa komi etu. 13 Tapi nadea mpuꞌu tau ri seꞌi, pade weꞌi-weꞌi naujamo. Daꞌa mana maroso kami menggore ri sawalikuna. Pade parakara eꞌi daꞌa namala rapakaopu riarana saeo atau roeo, sabana nabete mpuꞌu silaka to nipowia kami. 14 Jadi aginamo topanggenika-topanggeniaka kami mombaurusi etu manjaliku pura-pura todea. Pura-pura tau ri kota-kota kami to nomporongo besi daꞌa to Yahudi kana marata mantingayo topanggeniaka etu ri tempo-tempo to nipakatantu. Ira kana marata mpasanggani-nggani ante totuꞌa-totuꞌa bo topotangara-topotangara nggari kota ira sambaꞌa bo sambaꞌa. Ante iwetu bilisi rara Alatalata to najela-jela sabana silaka etu daꞌa mawela kami.” 15 Tapi Yonatan ana Asael bo Yahzeya ana i Tikwa nosanggani ante i Mesulam bo Sabetai tau to Lewi daꞌa nasituju ante pombarata etu.
16 Tau-tau to natingguli nggari petoꞌo ira nipobatua nasadia mantuki sintuwu etu. Jadi Ezra topanggeni agama nompelisi bara sakuya mbaꞌa topanggeniaka mbira ira santina bo nantulisi sanga-sanga ira. Pade ri eo pamulana ri wula sampulu ira nasiromu nolibu ala mompekinoto parakara etu. 17 Pade ri tanggal saongu wula saongu naopu puramo niurusi ira pura-pura langgai to nomporongo besi-besi daꞌa to Yahudi.
Sanga tau-tau to nomporongo besi-besi daꞌa to Yahudi
18 Eꞌimo sanga-sanga topanggeni-topanggeni agama Yahudi to nomporongo besi-besi daꞌa to Yahudi:
Nggari muli Yesua ana Yozadak bo sampesuwu-sampesuwuna: i Maaseya, Eliezer, Yarib bo i Gedalya. 19 Ira nojanji mombasompo rongo ira sambaꞌa bo sambaꞌa, pade nipesomba ira sambaꞌa bimba tuama nggari lunu bimba ira majadi pesomba mombasompo sala ira.
20 Nggari muli Imer: Hanani bo i Zebaja.
21 Nggari muli Harim: i Maaseya, Elia, i Semaya, Yehiel bo Uzia.
22 Nggari muli Pashur: Elyoꞌenai, i Maaseya, Ismael, i Netaneel, Yozabad bo Elasa.
23 Nggari tau-tau to Lewi: Yozabad, i Simei, i Kelaya (to nidae i Kelita), i Petahya, Yuda bo Eliezer.
24 Nggari topodade ri Sapo Mpepue: Elyasib.
Nggari topojagai bobaa Sapo Mpepue: i Salum, i Telem bo Uri.
25 Nggari tau-tau to Israel ntanina, eꞌimo sanga ira:
Nggari muli Paros: i Ramya, Yezia, i Malkia, i Miyamin, Eleazar, Malkia bo i Benaya.
26 Nggari muli Elam: i Matanya, i Zakharia, Yehiel, Abdi, Yeremot bo Elia.
27 Nggari muli Zatu: Elyoꞌenai, Elyasib, i Matanya, Yeremot, i Zabad bo Aziza.
28 Nggari muli Bebai: Yohanan, i Hananya, i Zabai bo Atlai.
29 Nggari muli Bani: Mesulam, i Malukh, Adaya, Yasub, i Seal bo Yeramot.
30 Nggari muli Pahat-Moab: Adna, i Kelal, i Benaya, i Maaseya, i Matania, i Bezaleel, Binui bo i Manasye.
31 Nggari muli Harim: Eliezer, Yisia, i Malkia, i Semaya, i Simeon, 32 i Binyamin, i Malukh, bo i Semalya.
33 Nggari muli Hasum: i Matnai, i Matata, i Zabad, Elifelet, Yeremai, Manasye bo i Simei.
34 Nggari muli Bani: Maadai, Amram, Uel, 35 i Benaya, i Bedeya, i Keluhu, 36 Wanya, i Meremot, Elyasib, 37 i Matanya, i Matnai, bo Yaasai.
38 Nggari muli Binui: i Simei, 39 i Selemya, i Natan, Adaya, 40 i Makhnadbai, i Sasai, i Sarai, 41 Azareel, i Selemya, i Semarya, 42 Salum, Amarya, bo Yusuf.
43 Nggari muli Nebo: Yeiel, i Matica, i Zabad, i Zebina, i Yadai, Yoel bo i Benaya.
44 Ira pura-pura nomporongo besi-besi daꞌa to Yahudi. Pade rongo-rongo ante ana-ana ira nipopalai nggari jaꞌi tau-tau to Israel.