Tau-tau to nanjili ante Ezra nggari Tana Babel
8
Eꞌimo sanga topanggeniaka-topanggeniaka mbira ira santina bo posisunju sanga ntotuꞌa ntau to nalau mpasanggani-nggani ante aku nggari Tana Babel tempo poparenta Magau Artahsasta:2 Gersom muli Pinehas,
i Daniel muli Itamar,
i Hatus ana i Sekhanya muli Daud,
3 i Zakharia muli Paros, nosanggani ante satu limampulu mbaꞌa langgai ntanina to nitulisi sanga-sanga ira ri tuntu ntotuꞌa ira.
4 Elyoꞌenai ana i Zerahya muli Pahat-Moab, nosanggani ante roatu mbaꞌa langgai ntanina.
5 Sekhanya ana Yahaziel muli Zatu, nosanggani ante toluatu mbaꞌa langgai ntanina.
6 Ebed ana Yonatan muli Adin, nosanggani ante limampulu mbaꞌa langgai ntanina.
7 Yesaya ana Atalya muli Elam, nosanggani ante pitumpulu mbaꞌa langgai ntanina.
8 Zebaja ana i Mikhael muli Sefaca, nosanggani ante walu mpulu mbaꞌa langgai ntanina.
9 Obaja ana Yehiel muli Yoab, nosanggani ante roatu sampulu walu mbaꞌa langgai ntanina.
10 Selomit ana Yosifya muli Bani, nosanggani ante satu onompulu mbaꞌa langgai ntanina.
11 Zakharia ana i Bebai muli Bebai, nosanggani ante rompulu bo walu mbaꞌa langgai ntanina.
12 Yohanan ana i Hakatan muli Azgad, nosanggani ante satu sampulu mbaꞌa langgai ntanina.
13 Elifelet, Yehiel bo i Semaya, muli Adonikam to narata nggapurina, nosanggani ante onompulu mbaꞌa langgai ntanina.
14 Utai bo i Zabud muli Bigwai, nosanggani ante pitumpulu mbaꞌa langgai ntanina.
Ezra nompakasadia malau mpaka ri Kota Yerusalem
15 Aku nompasiromu ira pura-pura namosu binangga to noili mpaka ri kota Ahawa, pade ri saꞌa kami notenda tolumbengi kasaena. Tempo aku nompekinoto todea bo topanggeni-topanggeni agama, daꞌa nirataku kamba sambaꞌa nggari muli Lewi ri saꞌa. 16 Jadi nipokioku Eliezer, Ariel, i Semaya, Elnatan, Yarib, Elnatan, i Natan, Zakharia bo i Mesulam, to najadi topanggeniaka-topanggeniaka, pade Yoyarib bo Elnatan to najadi guru. 17 Ira niperapiku malau mosintomu ka Ido, topanggeniaka to Lewi ri Bagia Kasifya. Nipakanotoku ka ira nuapa to ratesa ira ka Ido bo sampesuwu-sampesuwuna to Lewi to najadi topokarajaa ri Sapo Mpepue to netoꞌo ri Bagia Kasifya etu. Niperapiku ala ira mompakau tau-tau mpaka ri jaꞌi kami to malau mpasanggani-nggani ante kami mpaka ri Kota Yerusalem ala manggeni pesomba ka Alatala ri Sapo Mpepue kami. 18 Jadi nggari kabelo nu Alatala kami, ira nompakau mpaka ri jaꞌi kami Serebya, sambaꞌa tau to nataꞌu nggari mbira Mahli, muli Lewi ana Israel nosanggani ante ana-anana bo sampesuwu-sampesuwuna, kadea ira sampulu walu mbaꞌa. 19 Naria woꞌu i Hasabya bo Yesaya muli Merari, nosanggani ante sampesuwu-sampesuwu bo ana-ana ira, kadea ira rompulu mbaꞌa. 20 Pade naria woꞌu roatu rompulu mbaꞌa topokarajaa ri Sapo Mpepue, muli nggari tau-tau to nipakatantu Magau Daud bo pangga-pangga bete ntanina nggaulu mantulungi tau-tau to Lewi mantui bago etu. Sanga ira pura-pura nitulisi.
21 Naopu etu ri wiwi Binangga Ahawa etu, aku nanguli, “Kita pura-pura kana mapuasa ala mompakaede rara ri ngayo Alatala, pade merapi ka Iꞌa ala manggalendu kita, ana-anata bo pura-pura mbara-mbarata riara polumako.” 22 Naeya mataku merapi tantara bo tantara nesawi jara nggari jaꞌi magau ala manggalendu kami nggari bali-bali ri jala. Sabana notesamo kami ka magau iweꞌi: “Alatala kami nanggalendu pura-pura tau to nekou ri jaꞌi-Na, tapi narau rara-Na ri jaꞌi isema-sema to daꞌa natutu nomparasaya Iꞌa.” 23 Jadi napuasamo kami nerapi ala i Pue Alatala manggalendu kami, pade Iꞌa nompoiyo pomperapi kami.
24 Naopu etu nipelisiku sampulu rombaꞌa balengga topanggeni agama, etumo Serebya bo i Hasabya, nosanggani ante sampulu mbaꞌa roa ira topanggeni agama ntanina. 25 Aku nombatimba ka ira salaka, bulawa bo parewa-parewa to niwai magau mboto, bo timali-timalina, pangga-pangga betena, bo pura-pura to Israel to naria ri setu, majadi pesomba rapake ri Sapo nu Alatala kami. 26 Eꞌimo pesomba to nitimbaku ka ira: rompulu ronjobu kilo salaka, tolunjobu patatu kilo parewa salaka, tolunjobu patatu kilo bulawa, 27 rompulu ongu tubu bulawa, katomona walu kilo santongo, bo rongu parewa nggari tambaga daꞌa ria galona to nenggila, to naria olina nasimbayu ewa bulawa.
28 Pade nangulimo aku ka ira, “Komi bo pura-pura parewa eꞌi nipatani ka i PUE. Salaka bo bulawa eꞌi niwai ntau nggari dota rara ira mboto ka i PUE Alatala to nisomba ntotuꞌa komi nggaulu. 29 Alamo bo jagaimo etu sampe komi mamala mombatimba etu ka balengga-balengga topanggeni agama bo tau-tau to Lewi bo topanggeniaka-topanggeniaka nto Israel ri Kota Yerusalem, riara tombi-tombi Sapo Mpepue.” 30 Naopu etu topanggeni-topanggeni agama bo tau-tau to Lewi nantarima salaka, bulawa bo parewa-parewa to nitimba etu ala rakeni mpaka ri Sapo nu Alatala kami ri Kota Yerusalem.
Ezra bo tau-tau Yahudi narata ri Kota Yerusalem
31 Naliu etu ri tanggal sampulu rongu wula saongu nanggaliwomo kami nggari Binangga Ahawa nalau mpaka ri Kota Yerusalem. Pade Alatala to nisomba kami nantulungi kami bo nompakasalama kami nggari bali-bali bo parampo-parampo ri jala. 32 Naopu etu naratamo kami ri Kota Yerusalem, pade tolumbengi kasaena kami nangosaraka ri setu.
33 Ri eo kapataeona nalaumo kami mpaka ri Sapo Mpepue, pade ri setu kami nombatimba salaka, bulawa bo parewa-parewa ntanina. Pade etu pura-pura niwai kami ka i Meremot ana Uria topanggeni agama. Eleazar ana i Pinehas naria woꞌu ri setu nosanggani ante Yozabad ana Yesua bo Noaja ana i Binui, tau-tau to Lewi. 34 Pura-pura mbara-mbara etu nireke bo nitimba mpanjili, pade katomona nitulisi riara buku.
35 Tempo etu woꞌu todea to Israel to nanjili nggari petoꞌo ira nipobatua nanggeni pesomba to nipalabu ka Alatala nto Israel. To nipesomba ira sampulu rongu japi tuama manjaliku pura-pura to Israel, siompulu bo aono bimba tuama, pitumpulu bo papitu ana bimba, pade sampulu rongu towau tuama majadi pesomba posompo silaka. Pura-pura pesomba etu nipalabu ka i PUE.
36 Ira woꞌu nombawai sura parenta magau ka wakele-wakele magau bo gubernur-gubernur ri bagia ri sambote Binangga Efrat. Pade topanggeniaka-topanggeniaka etu nombawai petulungi ka tau-tau to Israel bo ka Sapo Mpepue.