Ezra bo tau-tau to Israel nalau mpaka ri Kota Yerusalem
7
Naopu Sapo Mpepue nibangu mpanjili, tempo Artahsasta najadi magau ri Persia, naratamo sambaꞌa tau nosanga ka Ezra nggari Tana Babel.a Ezra ana i Seraya, Seraya ana Azarya, Azarya ana i Hilkia, 2 Hilkia ana i Salum, Salum ana i Zadok, Zadok ana Ahitub, 3 Ahitub ana Amarya, Amarya ana Azarya, Azarya ana i Merayot, 4 Merayot ana i Zerahya, Zerahya ana Uzi, Uzi ana i Buki, 5 Buki ana Abisua, Abisua ana i Pinehas, Pinehas ana Eleazar, Eleazar ana i Harun to najadi Balengga Topanggeni Agama pamulana. 6 Ezra eꞌi narata ri Kota Yerusalem nggari Tana Babel. Iꞌa sambaꞌa guru agama to mpuꞌu-mpuꞌu nanginjani Atura-atura agama to nipapola i Musa to niwai PUE Alatala nto Israel. Magau Artahsasta nombawai ka Ezra pura-pura nuapa to niperapina, sabana i PUE Alatala nantulungi iꞌa.7 Ri mpae kapapituna tempo Magau Artahsasta noparenta, nalaimo Ezra nosanggani-nggani ante bara sakuya lunu tau to Israel. Ira etu topanggeni-topanggeni agama Yahudi, tau-tau to Lewi, topodade-topodade, topojaga-topojaga pewobo Sapo Mpepue, bo topokarajaa-topokarajaa ri Sapo Mpepue.
8 Naratamo Ezra ri Kota Yerusalem ri wula kaalimana, etumo ri mpae kapapituna tempo Magau Artahsasta noparenta ri Persia.b 9 Iꞌa nompamula polumakona nanjili nggari Tana Babel ri tanggal saongu wula saongu, pade narata ri Kota Yerusalem tanggal saongu wula alima, sabana i PUE nantulungi iꞌa. 10 Ezra nompakaliongu rarana mompekinoto Atura-atura i PUE, pade mantuki Atura-atura etu bo mompatuduki Atura-atura etu ka tau-tau to Israel.
Sura Magau Artahsasta ka Ezra
11 Eꞌimo sura to niwai Magau Artahsasta ka Ezra, topanggeni agama bo guru agama to nanginjani parenta-parenta bo atura-atura i PUE to nipakatantu-Na ka tau to Israel.
12 “Sura eꞌi nggari Artahsasta, magau nu pura-pura magau, ka Ezra, topanggeni agama bo guru agama to nanginjani Atura-atura Alatala to Neliu Nggakuasa ri suruga. Tabe. 13 Iweꞌimo parentaku: butu mbaꞌa tau to Yahudi riara poparentaku, nabelo ka topanggeni-topanggeni agama atau tau-tau to Lewi, bo tau-tau to Israel ntanina to madota malau mpaka ri Kota Yerusalem, mamala malau mpasanggani-nggani ante iko. 14 Sabana aku ante pitumbaꞌa timaliku nompakau iko malau mompekinoto ane tau-tau ri Bagia Yehuda bo Kota Yerusalem mpuꞌu-mpuꞌu nantuki Atura-atura Alatalamu to naria ri jaꞌimu. 15 Kenimo salaka bo bulawa to niwaiku ante timali-timaliku majadi pesomba nggari dota rara kami mboto ka Alatala nto Israel to naria ri Kota Yerusalem. 16 Keni woꞌu pura-pura salaka bo bulawa to murata ri pura-pura Propinsi Babel, mosanggani ante pewai-pewai to rawai todea bo topanggeni-topanggeni agama nggari dota rara ira mboto ka Sapo Mpepue Alatata ira to naria ri Kota Yerusalem. 17 Pakemo doi etu mpakabelo-belo rapangoli japi-japi tuama, bimba-bimba tuama, bo ana-ana bimba, ante gando bo ue anggur. Pade pesombamo pura-pura etu ri bunggu meja mpesomba riara Sapo Mpepue komi ri Kota Yerusalem.
18 Pura-pura salaka bo bulawa to nabolina mamala rapake komi mowia nuapa-nuapa to nireke nabelo ri jaꞌi komi bo sampesuwu-sampesuwumu nantuki dota i PUE. 19 Waimo ka Alatala ri Kota Yerusalem pura-pura parewa to niwai ka komi rapake mombasomba Alatala ri Sapo Mpepue komi. 20 Pade nuapa ntanina to daniparaluu ri Sapo Mpepue to masipato mubayari, mamala rabayari ante doi nggari petoꞌo pomboli doi magau.
21 Aku, Magau Artahsasta, nomparenta ka pura-pura topomboli doi ri bagia ri sambote Binangga Efrat iweꞌi: Nuapa-nuapa to raperapi Ezra topanggeni agama, guru agama to nanginjani Atura-atura nu Alatala to Neliu Nggakuasa ri suruga, kana masalisa rawai ka iꞌa. 22 Waimo ka iꞌa salaka daꞌa meliu nggari tolu njobu patatu kilo, gando daꞌa meliu nggari sampulu njobu kilo, ue anggur daꞌa meliu nggari ronjobu lite, lana daꞌa meliu nggari ronjobu lite, bo gara sakuya niparaluu. 23 Pura-pura nuapa to nipakatantu Alatala to Neliu Nggakuasa ri suruga, kana rapowia mpakabelo-belo ka Sapo-Na, ala poparenta magau bo ana-anana neꞌe mawela rau rara-Na. 24 Pade kami mompopanjani ka komi, daꞌa mamala raperapi ka balasitee nggari jaꞌi topanggeni-topanggeni agama, tau-tau to Lewi, topodade-topodade ri Sapo Mpepue, topojaga-topojaga pewobo Sapo Mpepue, topokarajaa-topokarajaa bo batua-batua to nantulungi ri Sapo Mpepue.
25 Ezra, iko kana mangonggotaka topanggeniaka-topanggeniaka bo topotangara-topotangara nantuki noto nggari jaꞌi Alatalamu to naria ri jaꞌimu. Ira kana mombatangara pura-pura tau to netoꞌo ri bagia ri sambote Binangga Efrat to nanginjani Atura-atura Alatalamu. Bo isema-sema daꞌapa nanginjani Atura-atura etu kana mupatuduki. 26 Butu mbaꞌa tau to daꞌa mantuki Atura-atura Alatalamu bo atura magau, kana rasuku masalisa, nabelo ka rasuku mamate, nabelo ka rapasuma makawao, nabelo ka raala pura mbara-mbarana atau ratarunggu.”
27 Pade nangulimo Ezra, “Ratoiyata i PUE Alatala to nisomba ntotuꞌata nggaulu! Iꞌa nombawai dota rara ka magau sampe iꞌa nompariara ntaꞌi Sapo Mpepue ri Kota Yerusalem, 28 bo nompowia aku nikonoa rara magau ante timali-timalina bo pura-pura pangga betena to nakuasa!”
Jadi nipakarosokumo raraku sabana PUE Alatalaku nantulungi aku. Pade nipasiromukumo bara sakuya mbaꞌa topanggeniaka nggari tatongo to Israel ala manjili mpasanggani-nggani ante aku.