6
Naopu etu Magau Darius nomparenta tau nomparesa ri petoꞌo pomboli buku-buku tuntu magau ri Babel. 2 Naliu etu ri Kota Ahmeta, kota pekalendu to naria ri Propinsi Media, nirata iramo saongu sura nilulu to nanguli iweꞌi:“Sura parenta nggari jaꞌi magau: 3 Ri mpae pamulana poparenta Magau Koresh, nisuwurakanamo parenta nantesa Sapo Mpepue ri Kota Yerusalem iweꞌi: ‘Sapo Mpepue etu kana rabangu mpanjili majadi petoꞌo tau mombawai pesomba to nisambale bo pesomba to nitunu.a Kalangana kana rompulu bo papitu metere, pade karembana rompulu bo papitu metere. 4 Pade leru-leruna kana rapowia nggari toluntapi watu to nabete-betena bo santapi kayu. Doi to rapake mowia etu kana raala nggari petoꞌo pomboli doi magau. 5 Pade parewa-parewa bulawa bo salaka to niala Magau Nebukadnezar nggari Sapo Mpepue ri Kota Yerusalem pade nikenina mpaka ri Tana Babel, kana rapopanjili, pade rakeni mpanjili mpaka petoꞌo pamulana ri Sapo Mpepue ri Kota Yerusalem. Pade parewa etu kana raboli riara Sapo Mpepue.’
6 Umba komi, i Tatnai, gubernur ri bagia sambote Binangga Efrat, bo i Syetar-Boznai bo roa-roamu, pangga-pangga bete ri bagia sambote Binangga Efrat, neꞌe komi malau mpaka ri Sapo Mpepue etu! 7 Pakambamo gubernur to Yahudi bo topanggeniaka-topanggeniaka to Yahudi mombabangu Sapo Mpepue etu ri petoꞌona bopia.
8 Pade niparentaku woꞌu nuapa to masipato rapowia komi mantulungi topanggeniaka-topanggeniaka nto Yahudi mombabangu Sapo Mpepue etu. Doi to rapake ira kana raala nggari petoꞌo pomboli doi magau, etumo doi balasitee nggari bagia ri sambote Binangga Efrat. Pura-pura doi to niparaluu ira etu kana rawai ka ira ante daꞌa rapakasae-sae. 9 Pade wai ka ira woꞌumo nuapa to niparaluu ira, ana japi tuama, bimba pomawa bo ana bimba majadi pesomba rapalabu ka i Pue Alatala to Neliu Nggakuasa ri suruga. Pade eo-eo kana rawai ka ira gando, gara, ue anggur bo lana nantuki to nipakatantu topanggeni-topanggeni agama ri Kota Yerusalem. Nuapa-nuapa to niparaluu ira kana rawai ka ira ante daꞌa rakalinga, 10 ala ira bate-batena manggeni pesomba to mompakadamba rara Alatala to Neliu Nggakuasa ri suruga, bo momposambaya magau bo ana-anana.
11 Pade niparentaku woꞌumo sema-sema daꞌa matundu riara atura eꞌi, kana raosu sampeka tinja nggari sapona ala rapombasumpa iꞌa ri wuntu nu tinja etu. Pade sapona kana rapakagero pura pade rapajadi petoꞌo pantijaka rumpu. 12 Perapi Pue Alatala to nompelisi Kota Yerusalem majadi petoꞌo rapombasomba Iꞌa, mompakaropu butu mbaꞌa magau bo tau nggari butu-butu ngata to mombaliunaka atura eꞌi, pade mompakagero Sapo Mpepue to naria ri Kota Yerusalem. Aku, Darius to nomparenta eꞌi. Pajalamo parenta etu mpakabelo-belo.”
Sapo Mpepue naopu nibangu bo nipareki
13 Naopu etu i Tatnai, gubernur bagia ri kasolo nu eo Binangga Efrat, i Syetar-Boznai bo roa-roa ira nompowia mpakabelo-belo nuapa pura to niparenta Magau Darius etu. 14 Topanggeniaka-topanggeniaka nto Yahudi nompapola pokarajaa Sapo Mpepue etu ante nabelo ante pekeniaka tesa Alatala to nipasimbayu nabi Hosea bo nabi Zakharia ana Ido. Ira nompakaopu Sapo Mpepue etu nantuki parenta Alatala nto Israel, bo nantuki parenta i Koresh, i Darius bo Artahsasta, magau-magau to Persia. 15 Jadi sapo etu naopu nibangu ri tanggal toluongu wula Adar, etumo ri mpae kaaonona poparenta Magau Darius.
16 Naopu etu todea Israel, topanggeni-topanggeni agama, tau-tau to Lewi bo tau-tau ntanina to natingguli nggari petoꞌo ira nipobatua ri Babel nowia posusa posukuru ka Sapo Mpepue ante nadamba-damba. 17 Tempo posusa posukuru etu ira nanggeni pesomba satu ongu japi tuama, roatu ongu bimba tuama, bo patatu ongu ana bimba. Pade naria woꞌu sampulu rongu towau tuama nipesomba mombasompo silaka njumaongu todea Israel, nantuki kadea suku-suku to Israel. 18 Ira woꞌu nombabagi-bagi topanggeni-topanggeni agama bo tau-tau to Lewi nantuki lunu ira, ala mantui bago mepue ka Alatala ri Kota Yerusalem, nantuki to nitulisi riara Buku i Musa.
Posusa Eo Bete Paska
19 Pade ri tanggal sampulu ampa wula pamulana, tau-tau to nanjili nggari petoꞌo ira nipobatua nompowia Posusa Eo Bete Paska. 20 Pura-pura topanggeni agama bo tau-tau to Lewi nanggawia ada nompegasa koro ira mboto nantuki ada pompegasa koro sampe mamala mowia posusa etu. Naopu etu ira nanjambale ana bimba ka pura-pura to Yahudi to nanjili nggari petoꞌo ira nipobatua, pade ka roa-roa ira topanggeni agama ntanina, pade ka ira mboto woꞌu. 21 Tau-tau to Israel to nanjili nggari petoꞌo ira nipobatua nanggoni panggoni posusa etu, mpasanggani-nggani ante tau-tau ntanina ri ngata etu to nompatani koro ira nggari pokainggu to natantoru to nipowia tau-tau to netoꞌo ri setu. Tau-tau etu nosigalo ka tau-tau to Israel ala mepue ka i PUE Alatala nto Israel. 22 Ira nowia Posusa Roti Daꞌa Nidika Ragi ante nadamba-damba pitu eo kasaena. Etu nipowia ira sabana i PUE nompakadamba rara ira ante nombabali pekiri magau to Asyurb ri jaꞌi ira sampe iꞌa nantulungi ira nombabangu Sapo Mpepue Alatala nto Israel.