Magau Darius nompaloga tau nompapola mombabangu Sapo Mpepue
5
Tempo etu nabi Hagai bo nabi Zakharia ana Ido, nompasimbayu tesa nggari jaꞌi Alatala nto Israel ka tau-tau to Yahudi to netoꞌo ri Bagia Yehuda bo Kota Yerusalem. Iꞌamo Alatala to nosanggani-nggani ante ira. 2 Nangepe etu nompamulamo i Zerubabel ana i Sealtiel bo Yesua ana Yozadak nombabangu mpanjili Sapo Mpepue to naria ri Kota Yerusalem. Ira niporoa bo nitulungi nabi-nabi Alatala etu. 3 Tapi ri tempo etu woꞌu naratamo i Tatnai, gubernur bagia ri sabingga kasolo nu eo Binangga Efrat, nosanggani-nggani ante i Syetar-Boznai bo roa-roa ira, pade niulina ka tau-tau to Yahudi iweꞌi: “Isema to nompaloga komi mombabangu sapo eꞌi bo mompakaopu tembo eꞌi?” 4 Pade nipekutanana woꞌumo ka ira, “Isema sanga tau-tau to nombabangu sapo eꞌi?” 5 Tapi Alatala nompariara ntaꞌi topanggeniaka-topanggeniaka nto Yahudi. Jadi ira daꞌa nipasuꞌu menonto mokarajaa sampe gubernur mompakatu sura ka Magau Darius pade mantarima balasi sura etu.6 Eꞌimo sura to nipakatu i Tatnai, gubernur bagia ri sambote Binangga Efrat, nosanggani-nggani ante i Syetar-Boznai bo roa-roana, pangga-pangga bete ri bagia etu, ka Magau Darius.
7 Iweꞌimo isi sura to nipakatu ira: “Tabe nggari jaꞌi kami ka Magau Darius. 8 Paraluu ranjani magau, kami narata ri Bagia Yehuda mpaka ri Sapo Mpepue Alatala to Neliu Nggabete. Sapo etu nibangu ante watu to nabete-betena, pade leruna nilampi ante kayu. Pokarajaa etu nikarajaa mpakabelo-belo bo nipapola ante daꞌa ria kakajana.
9 Pade kami nompekutana topanggeniaka-topanggeniaka nto Yahudi etu iweꞌi: ‘Isema to nompaloga komi mombabangu sapo eꞌi bo mompakaopu tembo eꞌi?’ 10 Pade nipekutana kami woꞌu sanga-sanga ira ala mamala rapopanjani ka komi sanga-sanga ntau to nanggeniaka ira.
11 Iweꞌimo pesono to niwai ira ka kami: ‘Kami eꞌi batua nu Alatala to Neliu Nggakuasa ri suruga bo ri dunia, bo kami mombabangu mpanjili Sapo Mpepue to nibangu mpae-mpae naliu. Etu nibangu bo nipakaopu sambaꞌa magau Israel to nakuasa nggaulu. 12 Tapi naopu totuꞌa kami nompakarau rara Alatala to Neliu Nggakuasa ri suruga, ira niwai-Na riara mpale Nebukadnezar, tau to Kasdim to najadi magau to Babel. Iꞌa nombagero Sapo Mpepue bo nanggeni mpalai todea kami nipobatua ri Tana Babel. 13 Tapi ri mpae pamulana poparenta i Koresh, magau to Babel, naria parenta nisuwuraka Magau Koresh ala mombabangu mpanjili Sapo Mpepue eꞌi. 14 Pade parewa-parewa bulawa bo salaka nggari Sapo Mpepue to niala Magau Nebukadnezar nggari Sapo Mpepue ri Kota Yerusalem pade nikenina mpaka ri petoꞌo mpesomba ri Tana Babel, niala Magau Koresh nggari petoꞌo mpesomba etu, pade niwaina ka sambaꞌa tau to nosanga ka i Sesbazar to nionggotakana najadi gubernur. 15 Niparenta magau ka iꞌa iweꞌi: “Alamo parewa-parewa eꞌi, pade kalaumo bo bolimo etu riara Sapo Mpepue ri Kota Yerusalem. Pade pakambamo Sapo Mpepue etu rabangu mpanjili ri petoꞌona bopia.” 16 Naliu etu naratamo i Sesbazar nompowia pandasi Sapo Mpepue to naria ri Kota Yerusalem. Pade nompamula nggari tempo etu sampe weꞌi-weꞌi Sapo Mpepue etu nikarajaa, tapi daꞌapa naopu.’
17 Jadi, ane rapekiri komi mabelo, kana raparesa riara sapo pomboli buku-buku tuntu magau ri Kota Babel, ala manggita ane nakono Magau Koresh nomparenta mombabangu mpanjili Sapo Mpepue ri Kota Yerusalem etu. Maopu etu perapi nuapa to nipodota komi rapowia ka Sapo Mpepue etu rapakatu ka kami.”