Bali nto Yahudi nangewa ira mombabangu mpanjili Sapo Mpepue
4
Bali-bali to Yehuda bo to Benyamin nangepe lele tau-tau to Yahudi to natingguli nggari petoꞌo ira nipobatua mombabangu mpanjili Sapo Mpepue Alatala nto Israel. 2 Jadi nalaumo ira nosirata ka i Zerubabel bo topanggeniaka-topanggeniaka mbira ira santina to Israel, pade nanguli ka ira, “Palogamo kami mombabangu Sapo Mpepue mpasanggani-nggani ante komi, sabana kami woꞌu topomparasaya Alatala komi nasimbayu ewa komi. Kami batena nanggeni pesomba ka Iꞌa nompamula nggari tempo Magau Esar-Hadon, magau to Asyur nombalinja kami mpaka ri seꞌi.”3 Tapi nangulimo i Zerubabel, Yesua bo topanggeniaka-topanggeniaka mbira ira santina to Israel ntanina ka ira, “Daꞌa urusa komi mosanggani-nggani ka kami mombabangu sapo ka i PUE Alatala kami! Kami mbotomo to mombabangu sapo ka i PUE Alatala nto Israel, ewa to niparenta i Koresh, magau to Persia ka kami.”
4 Jadi pue ngata to nasaemo netoꞌo ri setu nompakalente rara tau-tau to Yehuda bo nompakaeka rara ira mombabangu mpanjili Sapo Mpepue. 5 Daꞌa aga etu, nggari tempo Magau Koresh noparenta sampe ri tempo poparenta Magau Darius, ira nombasogo pangga-pangga bete to Persia ala mangewa tau to Yehuda etu ala daꞌa madupa nia ira etu.
Bali-bali to Yahudi nompasimbuku nompopenonto pokarajaa mombabangu Kota Yerusalem
6 Naopu bara sakuya mpulu mpae, tempo pamulana poparenta Magau Ahasyweros,a bali-bali to Yahudi nantulisi sura pepangadu nangewa tau-tau to Yahudi to netoꞌo ri Bagia Yehuda bo Kota Yerusalem.
7 Pade ri tempo poparenta Magau Artahsasta,b i Bislam, i Mitredat, i Tabeel ante roa-roana ntanina nantulisi sura ka Artahsasta magau to Persia. Sura etu nitulisi riara basa Aram ante batuana riara basa Persia.
8 Naopu etuc Gubernur Rehum, bo juru tulisi Simsai nantulisi sura ka Magau Artahsasta nompangadu todea ri Kota Yerusalam to nanguli iweꞌi: 9 “Sura eꞌi nggari jaꞌi Gubernur Rehum, juru tulisi Simsai bo roa-roana ntanina, etumo topotangara-topotangara, bo pura-pura pangga bete poparenta Persia, tau-tau nggari Kota Erekh, Kota Babel, Kota Susan ri Tana Elam. 10 Bo nggari tau-tau to nipatani Asnapar, magau to Aram to nakuasa bo nibila etu, pade nipakauna netoꞌo ri Kota Samaria bo ri bagia ntanina ri sabingga kasolo nu eo Binangga Efrat.” 11 Iweꞌimo isi sura to nitulisi ira ka magau:
“Sura ei nggari jaꞌi batua-batua magau to netoꞌo ri kasolo nu eo Binangga Efrat, ka Magau Artahsasta. 12 Paraluu ranjani magau, tau-tau to Yahudi to nanggaliwo nggari jaꞌi komi nomai mpaka ri seꞌi naratamo ri Kota Yerusalem. Ira danombabangu mpanjili kota njilaka bo najaꞌa etu. Ntora naopumo nipakabelo ira tembo-tembo bo pandasi kota etu. 13 Paraluu ranjani magau, ane kota etu rabangu mpanjili pade tembo-tembona rapakaopu, natantumo todea ri setu mana mombayari balasitee sampe kaopuna mompakarugi magau. 14 Kami daꞌa madota manggita magau rapakarugi sabana nantora kabelo magau ri jaꞌi kami. Sabana etu kami nompakau tau mompopanjani etu ka magau, 15 ala raparesa riara buku-buku tuntu magau. Riara buku-buku etu komi kana mombarata bo manginjani kota etu kota njilaka to batena nompakasusa magau-magau bo gubernur-gubernur. Pade todeana bate-batena nangewa pomarenta nggari tempo nggaulu sampe weꞌi-weꞌi. Etu sampe kota etu nipakaropu. 16 Kami mompopanjani ka magau, ane kota etu maopu rabangu mpanjili pade tembo-tembona rapakaopu, mana ntoto maria bagia raparenta magau ri sabingga kasolo nu eo Binangga Efrat.”
17 Jadi magau nombabalasi sura ira iweꞌi: “Sura eꞌi nggari jaꞌi magau ka Gubernur Rehum, juru tulisi Simsai, bo roa-roa ira ntanina to netoꞌo ri Kota Samaria bo ri bagia ntanina ri sambote Binangga Efrat. Tabe!
18 Sura to nipakatu komi ka aku nibasa ka aku ante batuana. 19 Pade nantuki parentaku, buku-buku tuntu magau niparesa, pade nirata tesa to nitulisi riara buku etu nompakanoto nompamula nggari tempo nggaulu Kota Yerusaem etu kota njilaka to bate-batena nangewa magau-magau, pade pue ngata etu bate-batena nangewa bo nanjapuaka pomarenta. 20 Pade tempo nggaulu naria magau-magau to nakuasa ri Kota Yerusalem, to noparenta pura-pura bagia ri sambote Binangga Efrat, pade todea nombabayari balasite ka ira. 21 Sabana etu pakaumo tau-tau ri setu menonto mokarajaa, ala ngata etu neꞌe rabangu mpanjili ane aku daꞌapa mombawai parenta. 22 Powiamo masalisa nuapa to niparentaku eꞌi. Neꞌe sampe poparentaku mantambai marugi!”
23 Jadi naopu sura nggari jaꞌi Magau Artahsasta etu nibasa ka i Rehum, juru tulisi Simsai bo roa-roana, nalaumo ira nasalisa mpaka ri jaꞌi tau-tau to Yahudi ri Kota Yerusalem, pade nompasuꞌu ira menonto mombabangu kota etu.
24 Jadi nenontomo pokarajaa nombabangu mpanjili Sapo Mpepue to naria ri Kota Yerusalem etu, pade batena nenonto sampe ri mpae karompaena poparenta i Darius, magau to Persia.