Powia meja mpesomba
3
Ri wula kapapituna, naopu to Israel netoꞌo ri kota-kota ira mboto, nasiromumo pura-pura todea ri Kota Yerusalem. 2 Jadi nompamulamo Yesua ana Yozadak bo sampesuwu-sampesuwuna topanggeni agama, bo i Zerubabel ana i Sealtiel bo sampesuwu-sampesuwuna nompowia petoꞌo mpesomba ka Alatala to Israel. Etu nipowia ira ala mombawai pesomba rapalabu ri bungguna, nantuki to nitulisi riara Buku Atura-atura agama to nipapola i Musa, batua nu Alatala. 3 Naupa ira naeka ka todea to netoꞌo ri ngata etu, ira batena nompowia meja mpesomba ri petoꞌona bopia. Pade ri bunggu meja mpesomba etu ira nombawai pesomba to nipalabu ka i PUE, etumo pesomba mpadondona bo pesomba ngguwiana. 4 Ira woꞌu nompowia Posusa Eo Bete Mowia Pakumpa nantuki to nitulisi riara Atura-atura i PUE.a Pade eo-eo ira nombawai pesomba rapalabu nantuki kadeana to nipakatantu Atura-atura etu rapesomba butu-butu eo. 5 Pade nompamula nggari tempo etu, ira bate-batena nombawai pesomba rapalabu. Pade ira woꞌu nombawai pesomba ri Eo Bete Wula Nggiki, bo ri butu-butu eo bete to nipakatantu majadi posusa to nagasa ka i PUE. Pade ira woꞌu nanggeni pesomba ntanina ka i PUE to niwai ira nggari dota rara ira mboto.6 Nompamula nggari eo pamulana wula kapapituna nompamulamo ira nombawai pesomba nipalabu ka i PUE. Tempo etu pandasi Sapo Mpepue daꞌapa nipowia. 7 Naopu etu ira nombawai doi ka pande nu watu bo topowia parewa nggari kayu. Pade ira nombawai panggoni, panginu, bo lana ka tau-tau to Sidon bo Tirus ala ira manggeni kayu aras nggari Tana Libanon. Kayu etu nikeni ira nantuki jala rarantasi sampe ri Kota Yafo, nantuki to niparenta i Koresh, magau to Persia ka ira.b
Pandasi Sapo Mpepue nipowia
8 Ri mpae karompaena naopu to Israel nanjili mpaka ri walea Sapo Mpepue ri Kota Yerusalem, ri wula karonguna, nompamulamo ira nombabangu mpanjili Sapo Mpepue. Tau to nokarajaa etumo i Zerubabel ana i Sealtiel bo Yesua ana Yozadak nosanggani-nggani ante sampesuwu-sampesuwu ira ntanina, etumo topanggeni agama, tau-tau to Lewi bo pura-pura tau to natingguli mpaka ri Yerusalem nggari petoꞌo ira nipobatua. Ira nompakatantu tau-tau to Lewi to noumuru neliu nggari rompulu mpae mombajagai topokarajaa Sapo Mpepue. 9 Yesua ntaliana bo sampesuwu-sampesuwuna, i Kadmiel ntaliana, bo tau-tau to Yehuda nosanggani-nggani nombajagai topokarajaa nombabangu Sapo Mpepue. Iwetu woꞌu muli Henadad ntaliana bo sampesuwu-sampesuwu ira to Lewi.
10 Tempo pandasi Sapo Mpepue nipowia ntopowia sapo, naratamo topanggeni-topanggeni agama nompake pakea ntopanggeni agama bo nanggeni kololio. Pade tau-tau to Lewi nggari muli Asaf nanggeni gimba nggedi ala mantoiya i PUE nantuki to nipakatantu i Daud, magau to Israel. 11 Ira nosinjono-njono nodade nantoiya bo nosukuru ka i PUE. Niuli ira,
“PUE etu nabelo,
towe-Na daꞌa ria kaopu-opuna ri jaꞌi todea-Na to Israel sampe ri kasae-saena.”
Pade pura-pura todea ri setu nongare nadamba-damba bo nantoiya i PUE, sabana pandasi Sapo Mpepue nompamula nibangu.
12 Tapi nadea ri tatongo topanggeni-topanggeni agama, tau-tau to Lewi bo topanggeniaka-topanggeniaka mbira ira santina to natuꞌamo to nanggita Sapo Mpepue nggaulu. Notumangimo ira ante suara nagai tempo pandasi Sapo Mpepue etu nipowia mpanjili ri ngayo ira. Naupa iwetu nadea tau ntanina nongare-ngare ante suara nagai sabana nadamba mpuꞌu rara. 13 Mana namala rapoposisala wamba ntau nongare nadamba-damba bo wamba ntau notumangi, sabana todea nongare-ngare ante suara to namangga/nagai (?) mpuꞌu sampe natiepe sampe nakawao.